Әскери адамдарға тән дәлдікпен Қорғаныс министрі С.Жасұзақов: «Мектептерге әскери даярлық сабақтары үшін арнайы киім алу қажеттілігі туралы ешқандай нұсқау берілген жоқ. Қорғаныс министрлігінің бюджетінде оқушыларға әскери киім алуға шығыстар көзделмеген» деп нақты, қысқа да нұсқа жауап беріпті.

Ал БҒМ министрлігінен келген жауап көпсөзділіктен жарысқа түскендей біраз нәрсені езген екен. Соның ішінде БӘД пәнін офицерлер, прапорщиктер, қатардағы сарбаздар мен солдаттардың әрқайсысы қанша пайыздан оқытатынына дейін көрсетіпті. Ал әскери киімге қатысты сөзбе-сөз келтірсек былай делінген: «Қазіргі уақытта білім мен қорғаныс саласындағы қолданыстағы заңнама мен нормативтік құқықтық актілерде БӘД сабақтарында арнайы киім кию мәселесі реттелмеген. Осыған байланысты БӘД сабақтарында арнайы әскери киім кию міндетті емес».

Жұртты дүрліктіріп, әскери киім талап етіп жүргендер БӘД-ті оқытатын жаңағы прапорщиктер мен солдаттар болып шықты... Ондайлар «шаш ал десе бас алатын» жаман мінездерін мектепке де әкелген сияқты. Әйтеуір мәселе аяғына жетті, халық киім алады екенбіз деп уайымдамауына болады.