7 сәуірдегі мәлімет бойынша, Қазақстанның жеті өңірінде су тасқыны салдарынан 5 711 бас ауыл шаруашылығы жануарлары, оның ішінде 1 137 бас ІҚМ, 4 051 бас ұсақ мал, 457 жылқы және басқа да ауыл шаруашылығы жануарлары қаза тапты. 1013 бас ауыл шаруашылығы жануарлары, оның ішінде ІҚМ - 133, ұсақ мал – 809, жылқы – 64 бас кәдеге жаратылды. Бұл туралы Ауыл шаруашылығы министрлігінің баспасөз қызметі хабарлады.

Елімізде су тасқынына қарсы іс-шаралар жалғасуда. Ауыл шаруашылығы министрлігінің мәліметінше, су басқан өңірлерде 60 мыңнан астам ауыл шаруашылығы жануарлары қауіпсіз жерге көшірілді. Оның ішінде Ақмола облысында - 18,8 мың бас, Қостанай облысында -12,9 мың бас, Ақтөбе және Атырау облыстарында – 10 мыңнан астам бас, БҚО-да - 4,5 мың бас, Қарағанды облысында - 1,5 мың бас.

«Алғашқы күндерден бастап су басу аймақтарында эпизоотиялық жағдайдың нашарлауына жол бермеу мақсатында Министрліктің Республикалық эпизоотияға қарсы жасағы облыс әкімдіктерімен бірлесіп қаза тапқан жануарларды жинау және кәдеге жарату жүргізілуде. 90 бірлік көлемінде тиісті техника, қызметкерлер штаты және жою іс-шараларын жүргізу үшін қажетті дезинфекциялық құралдар бар», - деп хабарлады Ауыл шаруашылығы министрлігі.

Су тасқыны кезінде қаза тапқан ауыл шаруашылығы жануарларының иелеріне өтемақы төлеу алгоритмі әзірленді. Құжат халыққа және залалды анықтау жөніндегі комиссияларға жіберілетін болады.