Денсаулық сақтау министрлігі міндетті әлеуметтік медициналық сақтандыру жүйесін енгізуді кейінге шегеру мәселесі бойынша парламентке заңнамалық өзгерістер ұсынды.

Бұл туралы Sputnik Қазақстан ақпарат көзі хабар таратты.

“Міндетті әлеуметтік медициналық сақтандыру бойынша медициналық көмек көрсетуді 2020 жылдың қаңтар айының 1-нен бастау туралы ұсыныс енгіземіз. Жеке тұлғалар, жалдамалы жұмысшылар, өз-өзін жұмыспен қамтушылар, оның ішінде жеке кәсіпкерлер мен азаматтық-құқықтық келісімшарт бойынша еңбек етіп жүргендер 2020 жылдың қаңтар айының 1-нен бастап жарна төлей бастайды. Сондай-ақ, кейбір санаттағы азаматтар үшін мемлекет тарапынан аударылатын жарнаны да осы уақыттан төлеуді ұсынамыз”, — деді парламент мәжілісінің комитет отырысында вице-министр Ләззат Ақтаева.

Оның айтуынша, азаматтық-құқықтық келісімшарт негізінде еңбек ететін азаматтардың жарна мөлшерін 5%-дан 1%-ға азайту ұсынылып отыр. Ал жұмыс берушілер 2018-2019 жылдары 1,5% мөлшерінде ақша аударуды жалғастыра береді.

“Бұл ретте 2020-2022 жылдары сақтандыру жүйесіне кірмеген азаматтарға тегін медициналық көмек көрсету сақталады”, — деді вице-министр.