Жапондардың Shimadzu Corp компаниясы осы уақытқа дейін белгілі уақыт туралы ұғымды өзгертетін шектен тыс дәл сағат жасап шығарды. Бұл жайында islam.kz порталы Oddity Central ақпарат көзіне сілтеме жасай отырып мәлім етеді. Aether Clock OC 020 деп аталатын сағат рекордты дәлдікпен уақытты көрсетеді: 10 млрд жылда бір секундқа қателесуі мүмкін. Бұл сағат осы күні секунды анықтау үшін пайдаланылатын замануи цезилік атом сағатынан 100 есе дәл. Пішімі мен пошымы тоңазытқышты еске түсіретін құрылғы 3 млн доллардан аса қаржыға бағаланып отыр. Ең басты артықшылығы тек дәлдігінде ғана емес, сонымен қатар, ықшамдылығында. Оны ғылыми зерттеулерде, геофизикада, тіпті, навигацияда пайдалануға болады. Бұл сағат лазермен салқындатылған стронция атомдарының негізінде жұмыс істейді. Олар оптикалық торда тіркеледі, содан кейін жоғары дәлдіктегі тактілік өткелдер арнайы камерада талданады. Құрылғының іші вакуумдық жүйемен, оптикалық резонатормен және лазерлік басқару жүйесімен қамтылған. Күншығыс елінің сарапшылары мұндай сағат өз кезегінде техтоникалық тақтаның қозғалысын қадағалауға, гравитация әсерін өлшеуге, жер қыртысындағы өзгерістерді айқындауға мүмкіндік береді. Ол ол ма, оны жанартау белсенділігін зерделеуге қолдануға болады. Бұрын тек зертханада ғана қолданылып келген сағатты ендігі жерде нақты инфрақұрылымға кіріктіруге болады. Бұл сағат ғылым саласында үлкен мүмкіндіктерге жол ашады.

Ұқсас материалдар:

Наносекунд қару ретінде: квантты сағат Британияны қорғайды

Қытай ғалымдары болашақтағы соғыстың сипатын өзгерту жолын тапты