Сауд Арабиясының билігі исі мұсылманның басты қаласы Меккені модернизациялауға бел буып отыр. "Болашақтың инвестициялық бастамасы" деп аталатын халықаралық жиында келешекте қасиетті қаладағы Харам мешітінің қалай өзгеретіні көрсетілді. Саудиялықтар қасиетті Қағбаның үстінен жылжымалы шатыр салуды жоспарлап отыр. Мекке мен Мәдина ЮНЕСКО-ның бүкіл әлемдік мұрасына кірмейтіндіктен аталған қалаларды саудиялықтар қалай өзгертемін десе де болады. Ең бастысы, қала тұрғындары мен меймандарына, солардың ішінде, қажыларға барынша қолайлы жағдай жасау, инфрақұрылымын жаңартып отыру қажет. Сондай-ақ, жоба бойынша Харам мешітінде намаз оқитын алты қабат салынады. Бұған қоса, қосымша 21 мың дәретхана, 860 эскалатор және мүмкіндігі шектеулі жандар үшін 24 лифт болашақта пайдалануға беріледі.