Ертең – бүкіл әлемдік исламға шақыру күні. Бұл шара осымен екінші рет қолға алынып отыр. Алдыңғысы – өткен жылы шілде айының 5-і күні Ислами білім беру және зерттеу академиясының (IERA) бастамасы бойынша өткен еді. Ал биыл қасиетті Рамазан айының алғашқы сенбісіне белгіленген. Аталмыш жоба ислами ұйымдар мен белсенділер арқылы қоғамға ағартушылық жолмен асыл дініміздің құндылықтарын насихаттауға бағытталған. Биыл бұл акция «Сен кімді сүйесің?» деген атпен өтеді. Мұндағы мақсат – әлем жұртшылығына Пайғамбарлар падишасы (Алланың сәлемі мен игілігі жаусын) туралы мағлұмат жеткізіп, екі әлем сардарының (с.а.у.) асыл қасиеттерін паш ету арқылы ислам дініне тарту болып табылады. Бұл іске атсалысқысы келетіндер алдымен тіркеліп, арнайы курстан өтуі керек. Бұл мұсылман емес елдерде қолға алынған шара болғандықтан елімізде бұл функцияны ҚМДБ және мүфтиятқа қарасты ұйым-мекемелер жүзеге асыруда.