Өзінің қажылық сапарынан соң Али Шах әлемді аралап, саяхат жасауға шығады. Саяхат барысында түрлі ғажайыптарға тап болған Али Шах дәл осы аралда өзінің ізбасарларын жолықтырған. Солардың бастамасымен 1431-жылы Али Шах атындағы мешіт салынады.

Айналасын су қоршаған аралдағы мешітке жету үшін адамдар алғашқы бес ғасыр бойы қайықпен қатынаған екен. Ал, 1944-жылы мешітке баратындар үшін арнайы жол төселіп бастайды.

Алайда, маусымдық жел уақытында алып толқындар жолды шайып кететін көрінеді. Дауыл басылған соң жолды биіктету үшін тағы да топырақ төгіледі. Ал, шілде-тамыз айларында жаңбыр маусымы басталған кезде мешіт қақпасы мүлдем жабық болады. Адамдардың алай-дүлей аласұрған теңіз толқындарының құрбанына айналмас үшін мешіт басшылығы осылай істеуге мәжбүр болады екен.

Ақ көбігін аспанға атқан дүлей толқындардың биіктігі кейде бірнеше қабатты үймен бірдей болып, адамдарды ағызып әкететін жағдайлар жиі болып тұрады екен. Дегенмен, жұма күндері бұл мешітке 40 000-нан астам адам жиналатын көрінеді.