Ливан астанасында 5700-ден аса адам қатысқан аса ауқымды ауызашар ұйымдастырылды. Бұл жайында Islam.kz порталы өз кезегінде An-Nahar ақпарат көзіне жөн сілтеген IslamNews агенттігіне сілтеме жасай отырып мәлім етеді. Бұл ауызашардың ауқымдылығы сонша – Гиннес рекордтар кітабына еніп, тарихта қалуы мүмкін. Елдің түкпір-түкпірінен, әр аймақтан жиналған жасы бар, жасамысы бар, түрлі әлеуметтік топтағы адамдар қатысқан ауызашар Ливан премьер-министрі Науап Сәламнің мұрындық болуымен Бейрут қаласының жағалау ауданындағы «Биел» көрме залында  өтті. Бұл ауызашарда кімдер болмады дейсіз – ливандық және палестиналық жетім қалған балалардан бастап, мектеп оқушылары мен жоғарғы оқу орнының студенттерінен жасақталған волонтерлер, қоғамдық ұйым өкілдері, т.б. болды. Бұл ауызашар қасиетті Рамазан айындағы қайырымдылықққа, ынтымақ пен береке-бірлікке бастайтын ең ірі шара ретінде есте қалатын болды. Осы ауызашар арқылы тек жамағаттың қана емес, сонымен қатар, қоғам мүшелерінің арасындағы әлеуметтік байланысты арттырып, ұлтты ұйытуды көздейді.