Біріккен Ұлттар Ұйымының қарарымен террористік ұйым ретінде танылған, әйелдерді білім алуына және жұмыс істеуіне қатаң тыйым салу арқылы адам құқығын өрескел бұзған тәліптер билігінің заңдылығын әлем мойындаған емес. Соған қарамастан Ауғанстан көрші елдермен және мұсылман мемлекеттермен, Қытаймен сауда-саттықты жандандырып келеді. Өткен жылы Ауғанстан 13 млрд долларға тауарлар экспорттаған және импорттаған. Бұл жайында islam.kz порталы өз кезегінде Тәжікстандағы Sputnik аагенттігіне жөн сілтеген IslamNews ақпарат көзіне сілтеме жасай отырып мәлім етеді. Ауғанстанның өнеркәсіп және сауда-саттық министрлігінің баспасөз хатшысы Әбдісалам Ахундзаданың айтуынша, ауған тауарлары негізінен Пәкістан, Үндістан, Бірікккен Араб Әмірліктері, Өзбекстан, Иран, Қазақстан, Қытай, Түркия, Ирак және Тәжікстанға жөнелтіледі (экспортталады). Экспорттың көп бөлігі інжір, мақта және мейіз секілді ауыл шаруашылығы өнімдері құрайды. Алайда, өткен жылы кілем, қорғасын, асыл тастар мен бағалы металдар экспорты артқан. Ал импортқа келетін болсақ, ауғандар сырттан дәрі-дәрмек, медициналық құрал-жабдық, бидай ұны, күріш тасымалдайды.