Жапония парламенті күншығыс елі қоғамында заңмен оқшауланып, кемсітушілікке ұшыраған алапеспен ауырғандардың отбасы мүшелеріне де өтемақы алуға мүмкіндік беретін заң жобасын қабылдады. Жапондардың Киодо ақпрат агенттігінің таратқан хабары мен келтірген дерегіне қарағанда, аталмыш өтемақы мөлшері 1,8 миллион иенді (16,6 мың доллар шамасында) құрайды. Бұл қаражат мөлшері бүгінгі таңда лепра немесе Хансен ауруы деп аталатын айықпас дертке шалдыққандардың отбасы мүшелерінің әрбіреуіне берілетін мөлшер ме әлде тұтас отбасына берілетін мөлшер ме, ол жағы нақтыланбаған. 1907-1996 жылдар аралығында аталған елде алапестерді қоғамнан оқшаулау туралы заң қолданыста болды. Тіпті, айықпас дертке шалдыққандардың кемсітуге ұшырағанына байланысты фильм де түсірілді, қоғамның қызу талқысына түсті, оның үстіне, Жапонияның әлемдік абырой-беделіне көлеңке түсірген, имиджіне нұқсан келтірген саясат ретінде бағаланды. 2001 жылы Жапония соты алапестердің қоғамнан оқшаулауды ел конституциясына қайша деп таныды, сол тұстағы премьер-министр Дзюнъитиро Коидзуми алапеспен ауырғандардан арнайы кешірім сұрады. Оларға өтемақы төленді. Алайда, алапеспен ауыратындардың туыстарына берілген емес. Алапесапен ауыратындардың туған-туыстары да қоғамнан теперіш көрді: оқуға түсе алмады, неке қидырғанда, т.б. маңызды жағдайларда кемсітуге ұшырап, құқықтары аяқ асты болды. Осы жолы өткен аптада қабылданған заң талаптарына сәйкес оларға да өтемақы төленетін болды. Аталмыш заң жобасын Либералды-демократиялық партия мен Жапонияның оппозициялық партиясы парламентке ұсынды. Күншығыс елінде мұндай өтемақыны 24 мың адам алатын болды. Оларға төленетін өтемақының жиынтық мөлшері - 40 млрд иен (368,4 миллион доллар шамасында).