Мысыр билігі халықтың шектен тыс көбеюіне байланысты шөлдің қақ ортасында жаңа астанасын тұрғызып жатыр. Міне, осы орталықта Африка құрлығында үлкендігі жағынан Мароккодағы Хасан ІІ монархтың атымен аталатын, 9 гектар аумақты алып жатқан, мұнарасының биіктігі 200 метрге жететін, құрылысына 13 жыл кеткен әрі 35 мың адам жабыла тұрғызған мешіттен кейінгі орында аса ірі мешіт тұрғызды. Бұл жайында islam.kz порталы өз кезегінде Yahoo!Finance дерек көзіне жөн сілтеген IslamNews ақпарат көзіне сілтеме жасай отырып мәлім етеді. Алайда, ел тұрғындары аталмыш жобаға наразы. Өйткені, бұл мешіт құрлысына 26 млн доллар қаражат жұмсалған. Кедейлік қамытын киген мысырлықтардың әлеуметтік инфрақұрылымы да сын көтермейтін деңгейде тозған. Бір мезетте 107 мың адам қатар тұрып намаз оқи алатын бұл ғибадат ғимараты бір емес, екі емес, үш бірдей рекорд жаңартты. Әлемдік деңгейде. Атап айтқанда, мінберінің биіктігі – 17 метр; алып аспалы шамның (люстра) салмағы 24300 келі тартады, ал диаметрі - 22 метр. Мысыр елі қазіргі уақытта  экономикалық терең дағдарысты бастан кешіріп жатыр – төл ақшасы, яғни, ұлттық валютасы соңғы жылы екі есеге құнсызданған, ал инфляция 5 жылда ең жоғары деңгейге жеткен.