Обырмен сырқаттанатын Британияның 16 жастағы тұрғыны Омар аш-Шейх өлер алдында өзінің сүйіктісімен некесін қидырып, төрт күннен кейін қайтыс болды. Бозбала некесін шариғат талаптарына сай қидырған болатын. Бұл жайында IslamNews порталы The Daily Mail ақпарат көзіне сілтеме жасай отырып, хабар таратады.Ол бір жылдай уақыт бойы лейкемиямен күресті. Сүйіктісі Эмимен өткен жылы танысқан болатын. Әлі мектеп қабырғасында оқитын оған ем қонбайтынына көздері жеткен дәрігерлер науқасқа мына фәниде татар дәмінің таусылуға жақын қалғанын, яғни, санаулы күндерден кейін бақилық болатынын ескертеді. Көп ұзамай суішкілігі таусылатынын дәрігерлерден білгеннен кейін ол сүйікті қызына көңілін білдіреді. Эми көзіне жас алып тұрып, оның ұсынысын қабыл алады. Олар некелерін емханада қидырады. Осы дүйсенбіде Омар көз жұмды, Жесір қалған Эми оның туыстарымен бірге сүйіктісін мұсылман ғұрпы бойынша ақтық сапарға шығарып салды.