Мұхаммед пайғамбарымызға салауат айту үлкен сауапты іс. Алла елшісі (с.а.у.) өзінің бір сөзінде: «Кім маған бір салауат айтса, Алла оған он салауат айтады» дейді. Салауаттың түрлері көп, соның ең қысқасы: «Аллаһумма салли аля сәиидинә Мұхаммед». Салауатты әр орынды сәтте айтуға бола береді, десе де арнайы айтылғаны ұнамды болған жерлер де бар, олар төмендегінше:
- Бейсенбінің түні.
- Жұманың күндізі.
- Сенбінің күндізінде.
- Жексенбінің күндізінде.
- Бейсенбінің күндізінде.
- Азанда және кешке.
- Мешітке кіргенде. («Бисмилләһ, уассаләту уәссәләму аля Расулилләһ, Аллаһуммағфирли зунуби, уәфтәх ли әбуәбә рохмәтик»).
- Мешіттен шыққанда. («Бисмилләһ, уассаләту уәссәләму аля Расулилләһ, Аллаһуммағфирли зунуби, уәфтәх ли әбуәбә фазлик»).
- Мұхаммед пайғамбардың қабірін зиярат еткенде.
- Қажылық рәсімі кезінде сафа мен мәруа арасында.
- Жұма құтпасында, айт құтпасында, неке құтпасында т.б.
- Азанның артынан қайталап болғаннан кейін.
- Қамат түсіріліп жатқанда.
- Дұғаның басында, ортасында және соңында.
- Тәлбия айтып болғаннан кейін (Тәлбия - Ләббәйкәлла...).
- Бір жиынға жиналғанда және одан тарарда.
- Дәрет аларда.
- Құлақ шыңылдағанда.
- Бір нәрсені ұмытқанда.
- Уағыз айтарда.
- Ілім үйретерде.
- Хадис оқитын кезде, басында және соңында.
- Дін сауал мен жауабын жазарда.
- Кітап жазарда.
- Неке қиярда1.
- Қиыншылдықта, қайғы, мұң басқанда, кешірім тілерде.
- Бір күнә істеп қойғанда.
Келесі жағдайларда салауат айту мәкруһ болмақ:
- Ерлі-зайыптылардың төсек қатынасы кезінде.
- Әжетін өтегенде.
- Сауда затын адамдарға көрсетіп паш етер кезде.
- Қателескенде.
- Таң қалғанда.
- Малды бауыздарда (Бұл кезде бисмилла, Аллаһу әкбар дейді).
- Түшкіргенде. (Түшкіргенде әлхамдулилләһ дейді).
1 Ибн Ғабидин: «Роддуль Мұхтәр». 231 бет. Арабша. (Теріп алынды).
