- Құрметті қазы мырза! Мені зынданға салғанын жанұям білмей қалады ғой. Тым болмаса жағдайымды айтып, қоштасып келсем бола ма? - дейді. Қазы:

- Қашып кетсең не істейміз?! Саған кім кепіл болады? - дейді. Қарыз алған адам:

 - Кепілге Расулалланы (с.а.у.) қоямын, - дейді.

Қазы діндар адам болатын. Бұл адамның шынайы ниетпен айтқан сөзіне сеніп, қоя береді. Әлгі адам отбасына келіп, болған жағдайды айтады. Кепілдікке Расулалланы (с.а.у.) қойғанын естігенде, барлығы  жылайды. Бұл жағдайдан шығу үшін бала-шағасымен бірге салауат айта бастайды. Түні бойы салауат оқып отырып, баршасы қалжырап, ұйықтап кетеді. Отағасы түсінде Расулалланы(с.а.у.) көреді. Расулалла (с.а.у.) бұл адамға:

- Ертең таңертең қала әкіміне бар. Менен сәлем айт, сенің қиыншылығыңды шешіп берсін. Қияметте мен оған шапағатшы болып, қиындығын шешемін де. Дәлелің не десе, әр күні бұл адам маған мың мәрте салауат айтатын, бірақ өткен түні жартысын ғана айтты. Ана беретін ақшасы соның өтеуі болсын деп айт, - дейді.

Бұл адам таң атқан соң,  қала әкіміне барып Расулалланың (с.а.у.) сәлемін жеткізеді. Қала әкімі:

- Сен маған сүйінші хабар жеткіздің. Өйткені, кімде-кім түсінде Алла елшісін (с.а.у.) көрсе, оны көргені. Расулалланың (с.а.у.)  бейнесіне шайтан кіре алмайды. Бірақ, қандай дәлелің бар? - дейді. Бұл болса:

- Сіз әр күні мың мәрте Пайғамбарымызға (с.а.у.) салауат айтады екенсіз. Бірақ өткен түні жартысын ғана айтыпсыз. Соның өтеуі ретінде менің қарызымды төлесін деп айтты, - дейді.

 Қала әкімі:

- Алла ұлық! Бұл нәрсені жанымда жатқан жұбайым да білмейді. Сенің түсің ақиқат. Маған сүйінші хабар жеткізгеніңізге Алла разы болсын! - деп бес жүз динар қарызын төлеуге, үстінен мың динар сүйінші хабары үшін береді.

Ақшаны ала салымен қазыға асығып келсе, қазы да соттың алдында бұны күтіп тұр екен. Қазы:

- Бауырым сені күтіп тұрмын. Сенің шарапатыңмен Расулалланы (с.а.у.) түсімде көрдім. Маған қарызға батқан адамның ақысын төлесең, Қияметте шапағат етемін деді. Маған одан үлкен бақыт жоқ! Міне бауырым, бес жүз динар қарызыңа, ал мына мың динар осы түс үшін, өйткені өмірі мұндай қуанышты түс көрмедім, - дейді.

Осылай, қазымен сөйлесіп тұрғанда, қарыз берген адам да келеді. Ол да:

 - Бауырым, сені іздеп келдім. Мен бүгін түсімде Расулалланы (с.а.у.) көрдім, маған:

 - Ана кісінің қарызын кеш. Қияметте саған шапағатым уәжіп болады, - деді. Қарызымды кештім. Ал, мынау сенің берекетіңмен осы түсті көргенім үшін мың динар сыйлығым, - деп ақшасын береді.

Осылайша кеше ғана қарызын берерге ақша таба алмай тұрған жан салауаттың шарапатымен үйіне төрт мың динар әкеліп, Аллаға көп шүкір етіпті. Пайғамбарымыз Мұхаммед Мұстафа  (с.а.у.) хадисінде: "Қиямет күні адамдардың Маған ең жақыны – мына дүниеде Маған көп салауат айтқаны"(Ат-Тирмизи),- деп айтқандай, Жаратқан Иеміз бізге көп салауат айтуды және Пайғамбарымызды (с.а.у.) түсімізде көруді нәсіп етсін!