Бірде пайғамбарымыз Мұхаммедке (с.а.у.) бір кісі келіп: «Уа, Алланың елшісі! Мен сізден қандай амал жасау арқылы ізгілікке қол жеткізетіндігімді сұрау үшін келдім», - деді.

Пайғамбарымыз (с.а.у.) оған: «Сұрақтарыңды қой мен жауап берейін», - деді.

Сұрақ қоюшы көкейіндегі сұрақтарын қойды, Пайғамбарымыз (с.а.у.) төмендегі жауапты берді:

- Адамдардың арасындағы ең білімді болғым келеді.

- Алладан шынайы қорық, адамдардың ең білімдісі боласың.

- Адамдардың ең байы болғым келеді.

- Алланың бергеніне шүкіршілік ет, адамдардың ең байы боласың.

- Ең әділетті адам болғым келеді.

- Өзіңе қалаған нәрсені өзгеге де қала, адамдардың ең әділі боласың.

- Адамдардың ең жомарты болғым келеді.

- Адамдарға пайда тигізуші бол, адамдардың ең жомарты боласың.

- Алланың ең сүйікті құлы болғым келеді.

- Сен Алланы көп еске ал, ең сүйікті құлдардан боласың.

- Иманымның қуатты болғанын қалаймын.

- Мінезіңді көркемде, иманың қуатты болады.

- Алладан шын қорқатын адам болғым келеді.

- Құлшылықтарыңды Алланы көріп тұрғандай жаса, егер сен Оны көрмесең, Ол сені көреді.

- Аллаға бойұсынушы құл болғым келеді?

- Бұйырғандарын орында, тыйғандарынан аулақ бол, бойсұнушылардан боласың.

- Қиямет күні Алланың құзырында дәрежемнің көтерілгенін қалаймын.

- Ешкімге қиянат жасама, қияметте Алла сенің дәрежеңді көтеретін болады.

- Қияметте Алланың мейіріміне бөленуді қалаймын.

- Өзіңе және Алланың құлдарына мейірімді бол.

- Күнәларымның азайғанын қалаймын?

- Көп тәубе ет, күнәларың азаяды.

- Шүкіршіл құлдардан болғым келеді?

- Ешбір нәрседе адамдарға шағымданба.

- Барлығынан күшті, қуатты болғым келеді?

- Аллаға тәуекел ет, барлығынан күшті, қуатты боласың.

- Алла менің несібемді көбейткенін қалаймын?

- Үнемі дәретпен жүр.

- Қиямет күні Алла тағаланың маған ашуланбайтындығына сенімді болғым келеді.

-  Алланың жаратқандарының ешбіріне ашуланба.

- Алланың менің дұға-тілектеріме жауап бергенін қалаймын.

- Тиылған нәрселерден өзіңді аулақ ұста, Алла сенің дұға-тілектеріңе жауап беретін болады.

- Қиямет күні Алланың құзырында кемшіліктерімнің жасырылғанын қалаймын.

- Өз бауырларыңның кемшіліктерін жасыр.

- Күнә мен қателіктерден не нәрсе сақтай алады?

- Көз жасы, итағат ету және ауру.

- Алла Тағала қандай амалды жақсы көреді?

- Көркем мінез, қарапайымдылық және қайғыға сабыр ету.

- Алла Тағалаға ұнамсыз амалдар қандай?

- Жаман мінез бен сараңдық.

- Осы дүниеде Алланың ашуын қайтаратын қандай амал бар?

- Жасырын садақа беру және ренжіскен екі адамның арасын татуластыру.

- Қиямет күні тозақтың отын сөндіретін қандай амал бар?

- Қайғы-мұңда сабыр ету.

- Алла мен Оның елшісінің (с.а.у.) сүйіктісі болғым келеді?

- Алла мен оның елшісінің жақсы көрген нәрселерін сен де жақсы көр! 

(Хадис Халид ибн Уалидтен риуаят етілген)