«Зәһратур Рияд» кітабында мынадай аңыз келтірілген.
Жақып пайғамбар (ғалейһиссәләм) өлім періштесі Әзірейіл ғалейһиссәләммен бауырлық байланыс құрған екен. Бір күні Әзірейіл періште Жақып пайғамбарды зияраттап келіпті. Жақып пайғамбар Әзірейілдің келгенін көріп:
- Уа, өлім періштесі! Маған қонақ ретінде келдіңіз бе, әлде жанымды алушы ретінде келдіңіз бе? - деп сұрайды.
- Қонақ ретінде келдім, - деп жауап береді періште. Сосын Жақып пайғамбар Әзірейілге:
- Сізден өтініп сұрайтын бір нәрсем бар еді, - дейді.
Періште:
- Ол не нәрсе? - дейді.
- Менің ажалым келіп, жанымды алуға келеріңізде мені алдын ала хабардар етсеңіз! - дейді Жақып пайғамбар.
- Жақсы. Сізге екі-үш хабаршы жіберемін, - дейді періште.
Уақыт өтіп, Жақып пайғамбардың ажалы таяғанда өлім періштесі Әзірейіл жанын алуға досына келіпті.
- Маған қонақ ретінде келдіңіз бе, әлде жанымды алушы ретінде келдіңіз бе? - деп сұрапты Жақып пайғамбар әдеттегінше.
- Жаныңызды алушы ретінде келдім - деп жауап беріпті періште. Ардақты періштенің бұл қылығын түсінбей:
- Маған алдын ала екі-үш хабаршы жіберемін дегеніңіз қайсы?! - депті Жақып пайғамбар. Сонда жан алушы Әзірейіл періште оған:
- Хабаршы жіберген болатынмын. Хабаршыларым: қара шашыңыздың ағаруы, бойдағы қуат қашып, әлсіреуіңіз және түзу денеңіздің қисаюы! - деп жауап беріпті1.
Періштенің хабаршысын байқамай, қапы қалмайық, ағайын!
islamkz
1 Имам Ғазали, «Мүкәшәфәтуль Құлуб».
