«Дүниежүзілік сауда ұйымына кірер алдында қойылған міндеттерді орындап жатырмыз. 2020 жылы біз шетелдік банктерге Қазақстанда филиалдарын ашуға мүмкіндік береміз. Осылайша, олар Қазақстан территориясында қызмет көрсете алады», - деді өкіл Астанада өтіп жатқан «Көпжақты сауда жүйесінің болашағына еуразиялық көзқарас: ДСҰ қосылу және ДСҰ қағидаларының эволюциясы» атты дөңгелек үстел кулуарында.

Оның пікірінше, шетелдік банктердің отандық қаржы нарығында жұмыс істеуі бәсекелестікті арттырып, көрсетілетін қызметтердің сапасын арттыруға жол ашады. Сондай-ақ, қарапайым тұрғындар ипотекалық несиені АҚШ және Еуропа елдеріндегі сияқты төмен проценттік ставкамен алуы мүмкін.

Естеріңізге сала кетейік, Қазақстан шамамен 20 жылға созылған келіссөздер нәтижесінде 2015 жылдың шілдесінде ДСҰ-ға ресми түрде мүше болды.