Ақмола обл.: «Arshaly Qus» құс еті өнімдері сертификатталды 

Ақмола облысы, Аршалы ауданы, Жалтыркөл ауылында орналасқан құс етін өндіруші «Ақ-Дала Агро» құс фабрикасы «QMDB Halal» сертификатына ие болды.

«Аумағы 36 гектарлық ферма – соңғы техникалық құралдармен жабдықталған алты құс қорасы, инкубатор, құрама жем өндіру цехы, сою цехы және бройлер өсіру орны тәрізді 4 алаңнан тұрады. «Ақ дала Агро» құс фабрикасы Ақмола облысындағы ауыл-аймақтарды, Нұр-Сұлтан қаласын құс еті өнімдерімен қамтамассыз етуде. Құс фабрикасының қуатты 10 мың тонна тауық етін өндіруге қауқарлы. 2023 жылы 22 мың тоннаға дейін жеткізу жоспарлануда», – дейді сертификаттау жұмыстарын жүргізген маман Данияр Сафиев.

Технолог және шариғат мамандарының қатысуымен құс фабрикасында бақылау-қадағалау шаралары жүргізіліп, құстың жем-азығынан бастап, сою, ет өңдеу, өндіру, дайындау, сақтау, тасымалдау процесстерінің халал стандарт талаптарына сәйкестігі тексерілді. Сонымен қатар, құс фабрикасы қасапшылары мен өзге де қызметкерлеріне халал турасында оқу-семинары өткізілді. Нәтижесінде, «Arshaly Qus» сауда белгісімен шығарылатын құс еті өнімдері «Халал өнімдерін өңдіруге, сақтауға тасымалдауға және сатуға қойылатын жалпы талаптар» және «Ауылшаруашылығы жануарлары мен құстарын сою» стандарттары бойынша сертификатталды.

«Arshaly Qus» құс еті өнімдерін берілген «QMDB Halal» сертификаты 03.03.2022-02.03.2023 ж мерзімі аралығында жарамды екенін хабарлаймыз!

Ақтөбе қ.: «Сарқыт» рестораны сертификатталды 

Ақтөбе қаласында орналасқан ең ірі тамақтану орындарының бірі – «Сарқыт» мейрамханасы және оған қарасты «Afsona» дәмханасы, «Wok point» және «Taksim» фаст-фуд өнімдері «QMDB Halal» стандарты бойынша сертификатталды. Сертификатты облыстың бас имамы Серікжан Еншібайұлы табыстады. Сертификаттау рәсіміне «Халал Дамудың» жергілікті өкілі Жарасхан Абдусаламов, кәсіпорын өкілдері және мешіт жамағаты қатысты.

«Халал – дініміз бен діліміздегі киелі ұғым. Халал ас – тіршіліктің негізі, құлшылықтың өзегі. Екі дүниенің сардары пайғамбарымыз Мұхаммед (с.ғ.с.): «Бір кісі қырық күн халалдан жесе, Алла Тағала ол кісінің жүрегін нұрландырады, жүрегіндегі хикметті тілінен ағызады», – деп адал астың рухани тұрғыдан тазаруға қаншалықты пайдалы болса, денсаулыққа да тигізер әсері орасан. Ендеше, ізгілікке ерген үмбет ретінде астың адалын тұтынуға ұмтылуымыз қажет. Осы орайда, өңірдегі халал өнімді тұтынушылар сұранысына орай «QMDB Halal» стандарты бойынша сертификаттаудан өткен қоғамдық тамақтану орындарының маңызы зор», – дей келе кәсіпорын өкілдеріне «QMDB Halal» сертификатын табыстап, кәсіптеріне береке тіледі.

Естеріңізге сала кетейік, «Халал Дамудың» бас сарапшы технологы Айжан Қалмаханқызының қатысуымен аталған тамақтану орындарында аудит шаралары жүргізіліп, дәмхана қызметкерлеріне оқу-семинары өткізілген болатын.