Қырғызстанда Орта Азия елдері, атап айтқанда, Қазақстан, Өзбекстан, Тәжікстан елдері арасындағы жеміс-жидек экспорты талданды. Бұл жайында қырғыздардың Tazabek ақпарат көзі хабар таратты. Бүгінгі таңда көкөніс пен жеміс-жидек экспортын әртараптандыру Орта Азия елдері үшін аса маңызды әрі көкейтесті салалардың біріне айналған. Бұл бағытта Қырғызстан, Тәжікстан және Өзбекстан экономикасы белгілі бір деңгейде ауыл шаруашылығына тәуелді, ал еліміздің, яғни, Қазақстанның ауыл шаруашылығында астық және ет өнімдеріне басымдық берілген. Аталмыш талдау нәтижесінен белгілі болғандай, Өзбекстан Орта Азия елдері арасында көкөніс пен жеміс-жидек экспорты бойынша көш бастаған. Нақтырақ айтқанда, Қазақстан мен Қырғызстанды және Тәжікстанды қоса алғанда Өзбекстанның көкөніс пен жеміс-жидек сауда-саттығындағы табысы шамамен 34 есе жоғары болып шықты.