Қазақстанда 12 наурыздан бастап еңбек шарттарын уақытында немесе толық тіркемегені үшін жауапкершілік енгізілді. Айыппұлдан қауіптенген қазақстандық компаниялар Еңбек шарттарын есепке алудың бірыңғай жүйесіне (ЕШЕБЖ) деректерді жаппай енгізе бастады.

10–11 наурыз күндері бизнес тәулігіне 100 мыңға дейін еңбек шартын тіркеген, бұл жүйеге уақытша жүктеме түсірген. Алайда, қазір HR Enbek сайтының жұмысы қалпына келтірілді, деп хабарлады Еңбек министрлігі.

Ведомствоның мәліметінше, 12 наурызға дейін деректерді енгізіп үлгермеген жұмыс берушілер оны қазір де енгізе алады. Айыппұл автоматты түрде салынбайды.

Министрлік былай деп түсіндірді: жұмыс берушілер бұрын цифрландырылмаған еңбек қатынастарын қазір де тіркей алады, себебі ЕШЕБЖ жүйесі үздіксіз жұмыс істейді, ал мерзімнен кейін тіркегені үшін автоматты айыппұл қарастырылмаған.

Жұмыс берушілерге қатысты шаралар тек ресми тексерістен кейін қабылданады. Егер заңбұзушылық анықталса, алдымен оны жою туралы нұсқама беріледі, бірден айыппұл салынбайды.

Сонымен қатар жұмыс берушілер жүйеге мәліметтерді уақытында енгізіп, оларды тұрақты түрде жаңартып отыруға міндетті.

Бұған дейін жұмыс берушілерді мына жағдайлар үшін айыппұлдау жоспарланған:

• ЕШЕБЖ жүйесіне деректерді енгізбеу немесе кеш енгізу;
• еңбек шарты туралы толық емес мәлімет беру;
• қате ақпарат ұсыну (соның ішінде реквизиттердегі қателер).

Алғашқы құқықбұзушылық үшін айыппұл:

• лауазымды тұлғаларға — 30 АЕК (120 мың теңге)
• шағын бизнес пен ҮЕҰ — 60 АЕК (260 мың теңге)
• орта бизнес — 80 АЕК (346 мың теңге)
• ірі бизнес — 150 АЕК (648,7 мың теңге)

Егер заңбұзушылық бір жыл ішінде қайталанса, айыппұл екі есеге өседі:

• лауазымды тұлғаларға — 60 АЕК (260 мың теңге)
• шағын бизнес пен ҮЕҰ — 80 АЕК (346 мың теңге)
• орта бизнес — 100 АЕК (433 мың теңге)
• ірі бизнес — 200 АЕК (865 мың теңге)

Қазіргі уақытта жүйеге 6,5 млн қолданыстағы еңбек шарты енгізілген.

Егер жұмыс берушілерде HR Enbek жүйесіне қатысты сұрақтар туындаса, 1414 байланыс орталығына хабарласуға болады.

Жалдамалы жұмысшы бола тұра өзін өзі жұмыспен қамтығандарды мемлекет тексереді

Қаржы министрлігінің Мемлекеттік кірістер комитеті жұмыс берушімен іс жүзінде еңбек қатынасында болуы мүмкін өзін-өзі жұмыспен қамтығандардың тіркелу жағдайларын талдауды бастады, деп хабарлайды Uchet.kz.

Бұл туралы МКК-нің арнайы салық режимдерін әкімшілендіру басқармасының басшысы Ерқанат Шынберген мәлімдеді.

Оның айтуынша, салық реформасынан кейін ведомство өзін-өзі жұмыспен қамтығандардың тіркелуін талдай бастады және бұл режим іс жүзінде еңбек қатынастарын рәсімдеу үшін қолданылып жатқан-жатпағанын тексеріп жатыр.

«Мәселе — сіз өзін-өзі жұмыспен қамтыған адам ретінде кімге қызмет көрсететініңізде. Егер сіз қызметті өз жұмыс берушіңізге көрсетсеңіз және онымен еңбек қатынасында болсаңыз, тіпті ресми келісімшарт болмаса да, бірақ бір адамға үнемі қызмет көрсетіп, сол жерде қызметкер сияқты тұрақты жұмыс істесеңіз, онда сұрақтар туындайды», — деді Ерқанат Шынберген.

Қазір МКК мамандары талдау жұмыстарын жүргізіп жатыр, себебі салық жүйесіндегі өзгерістерден кейін тіркелген өзін-өзі жұмыспен қамтығандардың саны айтарлықтай артқан.

«Өзін-өзі жұмыспен қамтығандар көбейді. Біз олардың ішінде кім осы салық режимін дұрыс қолданбай отырғанын талдауымыз керек», — деп түсіндірді комитет өкілі.

Ведомство дерегінше, кейбір компаниялар қызметкерлерін штаттан шығарып, кейін оларды өзін-өзі жұмыспен қамтыған ретінде тіркетіп, бұрынғы жұмыс берушісіне жұмысын жалғастыруына жағдай жасайтыны туралы белгілер тіркеліп жатыр.

«Бұған көз жұма қарауға болмайды, себебі, штаттағы қызметкерлері бар компаниялардың салық жүктемесі мен өзін-өзі жұмыспен қамтығандардың салық жүктемесінің арасында үлкен айырмашылық бар. Мұнда өте нәзік шекара бар — оның шын мәнінде өзін-өзі жұмыспен қамтығаны ма, әлде қызметкер екені анықталуы керек», — деп атап өтті Ерқанат Шынберген.

Жүргізіліп жатқан талдау қорытындысы бойынша Мемлекеттік кірістер комитеті салық режимдерін қолдану кезіндегі бұзушылықтар үшін жауапкершілікті күшейту жөнінде ұсыныстар дайындауы мүмкін екенін жоққа шығармайды.