Еліміздегі мамандар заңға жұқпалы аурумен ауырған адамдардың ағзасын донорлыққа алу туралы ұсыныс жолдады. Яғни, туберкулез, сары ауру, мерез сынды ауруға шалдыққандар қайтыс болғаннан кейін, олардың ағзасын алмақ, деп хабарлайды КТК арнасын сілтеме жасап Stan.kz.

Қазақстанда жұқпалы дертпен ауырғандардың ағзасын донорлыққа алуға заңмен шектеу қойылған екен. Мамандардың пікірінше, мұндай тыйымды алып тастаса, елімізде донорлар саны көбейер еді.

Бүгінде науқас донорлардың ағзаларын залалсыздандырып, дәл сол тәрізді дертке шалдыққан пациенттерге қолдану туралы мәселе үкіметте қаралуда.

«Мына сифилис, туберкулез деген емделетін жағдай. Тіпті, донор ауырғанымен, оның ағзасын алуға болады. Бірақ, емделсе бәрі қалпына келеді. Бұл біздің тәжірбие емес, дамыған елдердің тәжірбиесі», – дейді республикалық трансплантация орталығының ординаторы Жақсылық Досқалиев.

Былтырғы жылы елімізде қайтыс болған 24 адамның ағзасы донорлық мақсатта пайдаланылыпты. Ал биыл 9 мәйіттің ағзасы трансплантацияланған. Себебі, қайтыс болған 42 адамның бойынан түрлі ауру табылған көрінеді.