Қытай ғалымдары су мен майды айыратын, тиімділігі жоғары технологияны ойлап тапты. Бұл жайында islam.kz порталы Science мерзімді басылымына сілтеме жасай отырып мәлім етеді. Дәлірегі, Қытайдағы Шыңжан университеті ғалымдарының майлы сұйықтықтарды судан бөлудің тиімділігі жоғары технологиясы «Янус мембрана арнасы» (JCM) деп аталатын тәсілге негізделген: май мен суды қалпына келтірудің ерекше көрсеткіштері тиісінше 97% және 75%-ға дейін, тазалығы шамамен 99,9% қамтамасыз етілді. Негізінде мұнай мен судың қоспалары уақыт өте келе табиғи түрде өздігінен бөлінеді. Дегенмен, өнеркәсіптік процестерде май мен су табиғи жолмен бөліне бермейді немесе ұзақ уақыт алады. Кәдеге жарату кезінде центрифугалауды, майсыздандыруды, химиялық реакцияларды қоса алғанда басқа да түрлі әдістер қолданылады. Алайда, бұл әдістер көбінесе баяу, энергияны көп қажет ететін, тиімсіз болып келеді. Ғалымдар бұл тарапта жартылай өткізгіш мембраналардың жұбын пайдаланды: бір гидрофилді және бір гидрофобты. Мембраналар енi 4-тен 125 мм-ге дейiн реттелуi мүмкiн арнамен бөлiнедi – мұндай құрылым өз кезегінде бөлiну процесiн оңтайландырады. Мембраналар арасындағы шектелген кеңістік бөлу процесін күшейтеді, соның нәтижесінде қалпына келтіру коэффициенті жоғары: май үшін 97%-ға дейін және қоспалары аз су үшін 75%-ға дейін. Май мен су қоспасын камераға айдау үшін төмен қысым қолданылады. Мембраналар майды да, суды да алу үшін бір мезгілде жұмыс істейді. Майдың ұсақ тамшылары соқтығысып, гидрофобты мембрана арқылы оңай өтіп, сыртқы су қоймасына түсетін үлкенірек тамшылар түзеді. Сонымен бірге, су молекулалары гидрофилді мембрана арқылы сырғанап, басқа су қоймасына түседі. Мұнай химиясы, металлургия, азық-түлік және фармацевтика сияқты салалар майы көп сарқынды сулардың үлкен көлемін бөліп шығарады. Зерттеушілердің пікірінше, жаңа технология сарқынды суларды тазарту сапасын айтарлықтай жақсарта алады.