Мавритания – Африка құрлығының батысынла орын тепкен, халқының саны шамамен 4,5 млн адамды құрайтын шағын ел. Біз сөз етіп отырған елдің ресми атауы – Мавритания ислам республикасы. Берберлік тайпаның байырғы мекені болған жердің тарихы тым тереңде жатыр. Соған орай мәдениеті де бай. Бұл жайында Face 2 Face Africa ақпарат көзі хабар таратты. Мавритания атауы үшінші ғасырда пайда болды ежелгі Мавритания королдігі тұсында. Аталмыш королдік VII ғасырда құлады. Біз сөз етіп отырған африкалық елде араб тілі ресми тіл, алайда, бұқараның арасында бербер тілінің әсері қатты білінетін хассания диалектісі кең тараған. Мавританиядағы ең көне елді-мекендердің бірі Сахара шөлінің оңтүстік бөлігінде орын тепкен, 777 жылы іргетасы қаланған Шингетти қаласының кезінде сәулетімен, ғылым-білімімен, мәдениетімен, мешіттерімен, кітапханаларымен аты шыққан аса ірі сауда орталығы болған.  Шаһардағы құм мен кірпіштен соғылған мешіттер  қажылардың қасиетті сапарға шығар алдында жиналатын орын болатын. Мұндағы бас мешіт XIII-XIV ғасырларда тұрғызылған. Бұл мешіт Мавританияның ұлттық мақтанышы, символына айналған. Уақыт өте келе Шингеттиді құм құрсаулап, біртіндеп тарих қойнауына сіңіп барады. Құмдағы сағым қаланың кебін құшады көп ұзамай. Шингеттидің қашан қаңырап қалғаны белгісіз. Белгілісі, 1990 жылы елдегі қарулы қақтығыс кезінде қала жабылған болатын. 2000 жылы тарихи шаһар ЮНЕСКО-ның мәдени мұралар тізіміне енген еді.