Алматы қалалық Қоғамдық кеңестің онлайн отырысы барысында Ұлттық сараптама орталығының директоры Арнұр Нұртаев тұрғындарды өзін-өзі емдемеуге және дәріханаға бармауға шақырды, деп хабарлайды Қазақпарат.

«Мысалы, дене қызуы сәл ғана көтерілген адам дереу антибиотик сатып алуға тырысады. Іс жүзінде, вирустық пневмонияға антибиотик көмектеспейді, ол тиімсіз, өйткені антибиотиктер бактерияларға әсер етеді, бірақ вирустарға емес. Бактерияға қарсы препараттарды қабылдау арқылы Сіз иммунитетіңізді әлсіретесіз», - деп түсіндірді А.Нұртаев.

Отырыс барысында медицина ғылымдарының кандидаты Рафаиль Қыпшақбаев вирусқа қарсы препараттарды көп мөлшерде сатып алмауға шақырды. 

«Дәріханалардағы бағаның өсуіне өзіміз кінәліміз. Оны өзіміз қолдан жасаймыз. Адамдар дәріханаларға барып, вирусқа қарсы дәрі-дәрмектерді көптеп сатып алып жатыр. Есіңізде болсын, COVID-19 дәріханалардағы дәрілер көмектеспейді. Оларды сатып алудың қажеті жоқ. Әлемде коронавирусқа қарсы қолданатын дәрі әлі табылған жоқ», - деп түсіндірді доцент.

Өз кезегінде «СК-Фармация» ЖШС басқарма төрағасы Берік Шәріпов дәріханалардағы кейбір дәрі-дәрмектердің бағасының өсуіне байланысты жағдайды түсіндірді.

«Жекеменшік дәріханаларда вирусқа қарсы дәрілер жоқ деген сауалдар туындап жатыр. Біз жекеменшік дәріханаларға жауап бермейміз. Олар өз бетінше жұмыс істейді. Алайда, Денсаулық сақтау министрлігінде бағаны өсірмеу туралы бұйрық бар. Мысалы, бүгін бағасы 10 теңге болған дәріні, ертең 1000 теңгеден сатуға болмайды. Дәріханалар сатуға болатын шекті бағадан аспауы тиіс. Егер дәріхана осындай қадамдарға барса, онда олар ережені бұзады. Тиісінше, кез-келген азамат заңсыз әрекеттер туралы шағымдана алады»,- деп түсіндірді ол.

Пневмония - коронавирус инфекциясының көрінісі - ғалым пікірі

Медицина ғылымдарының докторы коронавирус пандемиясы кезінде пневмониямен ауыратындар санының күрт арту себебін түсіндірді.

С.Асфендияров атындағы Қазақ ұлттық медицина университетінің инфекциялық және тропикалық аурулар кафедрасының профессоры, медицина ғылымдарының докторы Равиля Егембердиева тікелей эфирде коронавирус кезіндегі пневмонияның өршу себебін түсіндірді, деп хабарлайды Azattyq Rýhy тілшісі.

«Қазіргі жағдайда пневмония коронавирустың көрінісі екенін айта аламын. Оларды бөліп-жаруға, мынау коронавирус, ал мынау - пневмония деп айтуға болмайды. Тағы да қайталап айтамын, пневмония - коронавирус инфекциясының көрінісі. Яғни, инфекция тыныс алу жолдары арқылы, бронх арқылы өтіп, өкпеге түсіп кетті және қабыну процесі жүріп жатыр деген сөз. Бұл пневмонияны зерттеу керек, ал пациент ПТР тест тапсырғаны жөн. Бұл коронавирус этиологиясының пневмониясы», - деді профессор.

Ол пневмониямен ауыратындар қандай жағдайда ауруханаға жатқызылатынын айтты. 

«Симптомсыз және жеңіл түрде ауырып жатқандар үй жағдайында емделеді. Ал демікпенің пайда болуы - адам үшін қауіпті. Тыныс алудың бір минуттағы жиілігін өлшеп отыру керек. Қалыпты жағдайда бұл 16-24 аралығында болады. Бұдан жоғары көрсеткіш пен температураның көтерілуі, жөтел мен тыныс алу кезіндегі ауырсыну ауруханаға жатқызуға себеп болады», - деді ол.

Айта кету керек, соңғы кездері Қазақстанның бірнеше өңірінде пневмониямен ауыратындар саны күрт артты.