Америкалық ғалымдар қатаю кезінде ауадан көмірқышқыл газын сіңіретін бетон әзірледі. Бұл экологиялық таза материал тәулік ішінде қатып үлгереді және құрылыс кезінде  атмосфераға бөлінетін CO ₂ деңгейін азайтуға көмектеседі. Бұл жайында islam.kz сайты hightech.fm ақпарат көзіне сілтеме жасай отырып мәлім етеді. Вустер политехникалық институтының (WPI) ғалымдары осындай бірегей құрылыс материалын жасап шығарды. Ферментативті құрылымдық материал (Enzymatic Structural Material, ESM) еріген CO ₂-ні кальций карбонатына айналдыратын ферменттерді пайдаланады. Ол құм бөлшектерін берік қаңқаларға байланыстырады. Процесс бөлме температурасында және қалыпты қысымда, күйдірілмей және ұзақ уақыт қатайтпай жүреді. 1 м ³ өндіру кезінде шамамен 330kg CO ₂ бөлетін қарапайым бетоннан айырмашылығы - ESM сол көлемге 6,1kg сіңіреді. Материал 25-30 МПа қысымға төзімді, су өткізбейді, жөндеуге келеді және толық өңделеді. Оны панелдерде, блоктарда немесе шатыр элементтерінде бірнеше сағат ішінде қалыптастырады. Ғалымдардың айтуынша, ESM-ді ішінара қолданудың өзі көміртекті көп бөлетін құрылыстың  экологиялық тиімділігін арттырады. Материал тез жасалатын конструкцияларға және табиғи апаттардан кейін қалпына келтіруге жарамды. Соған қарамастан алдымен оны түрлі климаттық жағдайларда тексеріп көреді.