Хелсинки университетінің ғалымдары әйел бедеулігінің себептерін зерттеу тәсілін едәуір өзгерте алатын маңызды жаңалық ашты. Бұл жайында islam.kz порталы The American Journal of Human Genetics (AJHG) мерзімді басылымына сілтеме жасай отырып мәлім етеді.  Таяуда нәтижесі жарияланған зерттеу барысында ата-анасының екеуінен де мұраға қалған TBPL2 геніндегі мутациялар әйелдердегі бедеулікке негізгі ықпал етуші фактор болуы мүмкін екенін анықтады. Бұл бағыттағы зерттеу аясында зерттеушілер бала көтере алмай жүрген 22 мыңнан астам әйелдің деректерін талдап, 200 мыңға жуық ананың мәліметімен салыстырып көрді. Бұл тараптағы зерттеу бедеуліктің пайда болу қаупін тудыратын гендердегі бес негізгі аймақты анықтады. Ғалымдар ТБПЛ2 геніндегі мутацияларға барынша назар аударды. Егер әйел ата-анасының екеуінен де TBPL2 генінің ақау шалған нұсқаларына ие болса, болашақта ана ататну мүмкіндігінен айырылады. Дегенмен, бұл мутация еркектің ұрпақ өрбіту қабілетіне әсер етпейтін болып шықты. Аталмыш зерттеуге жетекшілік еткен Финляндияның молекулалы медицина институтының Санни Руотсалайнен есімді ғалымы TBPL2 геніндегі мутация мен әйел бедеулігінің бары расталғанын жеткізді. ТБПЛ2 гені аналық бездердің ішіндегі басқа гендерді реттеуде басты рөл атқарады және оның мутациясы ұрықтың дұрыс жетілуіне кедергі келтіреді. Салдары: әйелдің осы өмірдегі ең басты миссиясынан - перзент сүйіп, ана атану мүмкіндігінен айырады.