Индонезиялық тайпа адамдарының таяуда интернетте пайда болған фото-суреттері күллі әлемнің назарын өзіне аударды. Таңғажайып тайпа адамдарының көзі көк теңізді көз алдыңа әкеледі. Бұл жайында islam.kz порталының материалынан біле аласыздар. Әлеуметтік желіде жабайы тайпа өкілдерінің суретін жариялаған Корчной Пасарибу (Korchnoi Pasaribu) есімді фотографтың өзі индоензиялық аралдардың бірінде туып-өскен екен. Бутунг аралында өмір сүретін бұл тайпа сыртқы әлеммен байланысы аз, оқшау тіршілік етеді, сол себепті де осы заманғы өркениет игіліктерінен мақұрым. 2019 жылы фотограф өзінің туған өлкесіне ұзақ саяхатқа шығады. Бұл суреттерді сол кезде таспаға тартып алған екен. Шашы да, терісі де қара торы болғанымен көздерінің көкшілдігі туабітті генетикалық ауытқушылықтан пайда болған. Яғни, біз сөз етіп отырған гетерохромия тайпасы өкілдерінің кейбіреуінің екі көзі бірдей тотияныдай көкпеңбек болса, енді бреулерінің бір көзі қара да екіншісі көк болып келеді.