Табиғи энергия көздері қазба отындарына қарағанда айтарлықтай тиімдірек екендігі дәлелденді. Өйткені, қазба отын өндіру процесі жаңартылатын энергияға қарағанда әлдеқайда көп қаражатты қажет етеді. Лидс университетінің Еммануел Арамендиа бастаған ғалымдар тобы осындай қорытындыға келді. Бұл жайында islam.kz порталы Ars Technica ақпарат көзіне сілтеме жасай отырып мәлім етеді. Зерттеушілер алынған энергияның жұмсалған энергияға (EROI) қатынасын бағалады. Ол үшін олар 1971-2020 жылдар аралығындағы мәліметтерді зерттеді. Дәстүрлі энергия түрлерінің ішінде пайда тұрғысынан ең жоғары мән табиғи газдың еншісінде болды – 9,5:1. Бұл көрсеткіш әр бірлікке шаққанда оны өндіруге және пайдалануға жұмсалатын қаржыдан 9,5 есе көп энергия алуға мүмкіндік береді деген сөз. Мысалы, көмір үшін бұл қатынас - 7,2:1, ал мұнай өнімдері үшін тек - 2:1 мәннен аспаған. Ғалымдар 50 жыл ішінде бұл тараптағы көрсеткіштердің мүлдем өзгермегенін атап өтті. Жалғыз ерекшелік - табиғи газ. Ол үшін отынды пайдалануға дайындау кезіндегі EROI көрсеткіші төмендеген. Сонымен бірге, энергияны пайдаланудың тиімділігі алға қойылған мақсаттарға байланысты екенін де ескеру керек. Ғимараттарды табиғи газбен жылыту кезінде бұл мән - 12:1, ал мұнай өнімдерінде 5:1-ді құрайды. Жаңартылатын энергияның көрсеткіштері қазба отындарына тән мәндерден әлдеқайда жоғары болды. Мысалы, жел энергиясының ең нашар мәні - 10:1, ал ең жоғары деңгейі 25:1-ге жетеді. Күн энергиясы сәл нашар болып шықты. Ең аз қатынас - шамамен 7:1 және олар шамамен 20:1-ге жетеді. Нәтижесі табиғи газдан да жоғары.