Михаил Полуэктов есімді ресейлік сомнолог дәрігер «Известия» мерзімді басылымына берген сұхбатында адам аян түстерді шынымен көре ме, жоқ па, деген сауалдар төңірегінде өз ойымен бөліскен екен. Бұл жайында islam.kz порталы аталған ақпарат көзіне сілтеме жасай отырып мәлім етеді. Дәрігердің айтуынша, адам түсті түнгі ұйқының шамамен төрттен бір бөлігін алатын тез ұйқы фазасында көреді. Осылай деген ол адам түсінде тек көрген-білгенінен артық түс көре алмайды, яғни, естеліктерді көреді. Өйткені, өмірінде ұшыраспаған жағдаяттарды түсінде көре алмайды. Ал аян түстерді белгілі бір жағдайлардың адамның шындық өмірдегі ахуалымен кездейсоқ байланысынан өзге ештеңе еместігін алға тартқан. Сондай-ақ, ол ояу кезінде ұдайы адам ойша болашағына бағдар сызып, келешегін қалай елестететінін ойлаумен болады. Саналы түрде, бейсаналы түрде. Мидың мұндай қызметі өз кезегінде болашақта болуы ықтимал жағымсыз сценарилердің алдын алуға немесе айналып өтуге мүмкіндік бермек. Түйсік бойынша келіп түскен жаңа ақпараттың арқасында болашақтың бұл көрінісі, әлі болмаған оқиғалар болжамы үнемі өзгеріп, нақтыланып отырады. Адам түстері, екінші жағынан, осындай естеліктерден ғана «тоқылады». Егер түсіндегісі өңінде тура келіп жатса, бұл құбылыс ойлаған болашақтағы оқиғаның көрінісі ғана болмақ.