Естеріңізде болса, Мысырда наурыз айында өткен президент сайлауы қарсаңында осынау саяси науқанға қатыспаған ел азаматтарына айыппұл салынатыны турасында хабарлаған болатынбыз. Авторитарлы елде билік азаматтардың еркімен санаса бермейді. Сол сайлауда Әбдіфаттаһ әл-Сиси 22 млн дауыспен жеңіске жетіп, билік тізгінін толық қолына алған еді. Яғни, дауыс берушілердің 97%-ның қолдауына ие болған еді. Бұған да көңілі толмаған билік, дәлірегі, аталмыш елдің бас прокуратурасы саяси науқанға орынды себепсіз қатыспағандарға 500 фунт (28 доллар) мөлшерінде айыппұл салмақ. Пирамидалар елінің сайлау комиссиясының келтірген мәліметіне қарағанда, 60 млн-дық сайлаушының 34 823 000-ы сайлау учаскесінде төбе көрсетпеген.