Turkish Airlines әуе компаниясы авиация саласында көш бастағаны үшін, яғни, ұшақтары мейлінше көп елге қатынау арқылы рекорд орнатып, Гиннеске енді. Бұл жайында islam.kz порталы IslamNews ақпарат көзіне сілтеме жасай отырып мәлім етеді. Мұндай беделді рекорд түріктердің жолаушыларды тасымалдау флагманы атанған аталмыш компанияның әуе кемесінің Чилидегі Сантияго халықаралық әуежайына ұшып барғанда тіркелді. Осылайша аталған әуе компанияның бағыт желісі 131-ші елмен толықты. Яғни, Turkish Airlines әуе кемелері әлемнің 131 еліне қатынайды. Өткен жылы 120 мемлекетке қатынап, Гиннес рекордтар кітабына еніп еді. 1933 жылы іргесі қаланған Turkish Airlines-тің ұшақтары әуелгі кезде санаулы мемлекетке ғана қатынайтын еді. Бірте-бірте іргесін кеңейтіп, бүгінде аса ірі әуе компанисына айналған. Бүгінде 352 бағытта 491 ұшақты пайдаланады.