Швецияда немере баққан ата-әжелерге ақша төленеді

KAZINFORM – Швецияда ата-әжелері немерелерін баққаны үшін мемлекеттен ақшалай жәрдемақы алуда. Тиісті заң биыл жазда күшіне енді, деп хабарлайды Еuronews.

Барлық әкімшілік демарштарды Швецияның Әлеуметтік сақтандыру агенттігі шешуде. Бұл – отбасылар үшін үлкен көмек.

Швецияда бала күтіміне арналған демалыс туралы жаңа ережеге сай, ата-аналарға 45 күнге дейін ақылы демалысын баланың заңды қамқоршысы емес адамға аударуға мүмкіндік беріледі. Жалғызбасты ата-аналар бір балаға 480 күндік ақылы демалыстың 90 күнін аудара алады.

Швецияның әлеуметтік сақтандыру агенттігі өкілінің айтуынша, жаңа заң ата-аналардың жұмыс пен жеке өмірі арасындағы тепе-теңдікті жақсартуға және гендерлік теңдікті нығайтуға бағытталған. Заңды ұсынған министр Швеция бүкіл Еуропаға үлгі болады деп үміттенеді.

«Бұл бүкіл Еуропа үшін жақсы үлгі бола алады деп ойлаймыз. Осылайша жастарды балалы болуға, сонымен бірге еңбек нарығында қалып, белсенді жұмыс жүргізуге ынталандыруға болады», - деді елдің Әлеуметтік қамтамасыз ету министрі Анна Тенье.

Әлеуметтік сақтандыру агенттігінің агенттікке хабарлауынша, тамыз айының соңына қарай 1500-ге жуық швед азаматы жаңа заң ұсынған мүмкіндіктерді пайдаланды.

Зарина Туғанбаева

Кореяда отбасын таяуда құрған ерлі-зайыптылар жұмысқа аптасына төрт күн барады

Оңтүстік Кореяда отбасын енді құрған ерлі-зайыптылар үшін төрт күндік жұмыс аптасы енгізіледі. Ол елдегі демографиялық ахуалды жақсарту үшін жасалмақ. Бұл әзірге сынақ ретінде қолға алынған жоба. Оған Кёнгидо провинциясындағы 50 компания қатысады. Жұмыс аптасы қысқарғанда, жастардың отбасына көңіл бөлуге уақыты көбеюі тиіс.

Қазір елде демографиалық дағдарыс ушығып барады. Бала туу көрсеткіші төмендеп кеткен. Өйткені, баспана қымбат. Баланы бағып-қағу шығындары да аз емес. Жастар мансап қуып, сәбилі болуға асықпайды. Осыған байланысты билік отбасын құруға ынталандыратын арнайы бағдарламаларды қолға алып жатыр. Тіпті, жалғызбасты жандарға кездесу ұйымдастырылады. Егер қарым-қатынасын жалғастыратын болса, оларға ақша төлейді. Бұдан бөлек баспана сатып алу және үй жалдап тұруға да қаржылай көмек бар.

24.kz

Ресейде ажырасу рекордтық көрсеткішке жетті

KAZINFORM – Ресейде ажырасу рекордтық көрсеткішке жетті. Росттаттың мәліметінше, үйленген 1000 жұптың 900 ажырасады екен. Елдің демографиялық дағдарысқа ұшырағанын ескерсек, халық саны бірнеше жылда тағы азаяды дейді мамандар. Бұл туралы Qazaqstan телеарнасы хабарлады.

Ресей ажырасу бойынша Португалия Испания, Люксембургтан кейін әлем бойынша төртінші орында. Бір жылда бір миллионнан астам жұп ажырасқан. Мамандардың айтуынша, басы себептердің қатарында экономикалық қиындықтар, инфляция, өмір сүру сапасының төмендеуі.

«Отбасыларды, әсіресе балалары бар отбасыларды сақтау үшін әртүрлі шаралар ұсынылады. Тіпті Мемлекеттік Думада арнайы медиацияға қатысты комитеттер құрылған», - дейді кәсіби меидатор Мира Моисеева.

Ең көп ажырасу Мәскеу, Тува, Дағыстанда тіркелген. Сондықтан мемлекет тарапынан жас отбасыларға баса көңіл бөлінбек. Кей шаруа қожалықтары мен кәсіпкерлер жұмысқа тек жас отбасыларды қабылдайды.

«Біз кәсіпорынға жас ерекшеліктеріне қарай қабылдаймыз. Жас отбасыларды көшіріп, үй болса екен дейміз. Немесе үйленбеген бойдақтар келсе, олардың да отбасы құруына көмек береміз», - дейді кәсіпкер Александр Росляков.

Парламентте психологтардың қатысуымен ажырасу туралы жаңа заң жобасы дайындалып жатыр. Бастамада кәмелетке толмаған балалары бар ерлі-зайыптылар ажырасудың алдында отбасын сақтау үшін отбасылық психологпен кеңесу керек деп көзделеді. Сондай-ақ, депутаттар бүкіл Ресейде ұзақ неке үшін арнайы төлемдер енгізуді ұсынып отыр.

Бақытгүл Абайқызы

Таиланд Королі бір жыныстылардың некесі туралы заңға қол қойды

KAZINFORM – Таиланд бір жыныстылардың некесін мойындаған Оңтүстік-Шығыс Азиядағы бірінші мемлекетке айналды, деп жазады ВВС.

Таиланд королі ел парламенті қабылдаған бір жынысты некені заңды түрде тану туралы заңға қол қойды. Осылайша, Таиланд Оңтүстік-Шығыс Азиядағы бір жынысты адамдар арасындағы одақтарды заңдастырған бірінші мемлекет болды.

Таиланд парламентінің жоғарғы палатасы маусымда заңды қолдады және ол сейсенбіде монархияның ресми газетінде жарияланды. Ол 2025 жылдың 22 қаңтарында күшіне енеді.

Заң неке дегенді бұрынғыдай ер мен әйелдің емес, екі адамның серіктестігі деп таниды. Біржынысты жұптар ерлі-зайыптыларға берілетін салық жеңілдіктерін пайдалануға, бір-бірінің мүлкін мұрагерлікке алуға және жұбайы ес-түссіз жатқан жағдайда оны емдеуге келісім беруге құқылы болады.

Біржынысты ерлі-зайыптылар да бала асырап ала алады. Алайда, депутаттар тиісті комитеттің «әке мен шеше» деген сөздің орнына «ата-ана» терминін қолдану туралы ұсынысын қабылдамады.

– Бүгін біз атымызды неке туралы куәліктерге ғана жазып қоймай, тарихтың жаңа парағына да жаза аламыз. Махаббат кім болып туғанымызға қарамайды. Бұл теңдік пен адами қадір-қасиеттің мерекесі, – деді Таиландтағы ЛГБТ құқықтарын қорғаушы Энн Чумапорн.

Ол заң күшіне енген күні мыңнан астам ЛГБТ жұптарының үйлену тойын ұйымдастырмақ ниетте екенін айтты.

Азиядағы жағдай қандай

Таиландта біржынысты некені тану үшін күрес 10 жылдан астам уақытқа созылды.

Ел тұрғындарының көпшілігі біржынысты некені қолдайды — өткен жылдың соңында жүргізілген сауалнамаға респонденттердің 96,6%-ы оң көзбен қарайтындықтарын айтқан.

Барлық Азия елдерінің ішінде тек Непал мен Тайвань ғана біржынысты некені заңдастырған (көптеген елдер Тайваньды егеменді мемлекет ретінде мойындамайды).

Сингапур 2022 жылы отаршылдық дәуірдегі бір жынысты қарым-қатынасты қылмыс деп санайтын заңның күшін жойды.

Жарасқан Нұрыбаев