KAZINFORM – Швецияда билік басындағылар жасөспірімдер арасында зорлық-зомбылық фактілерінің өсуіне байланысты қылмыстық жауапкершілік жасын 15-тен 13-ке түсіреді. Бұл туралы DW жазды.

Швеция премьер-министрі Ульф Кристерссон ауыр қылмыстар үшін тағайындалатын қылмыстық жауапкершіліктің жасын 15-тен 13 жасқа дейін төмендетуді көздейді. Үкімет қазан айында тиісті заң жобасын енгізді. 

– Стокгольм билігі қылмыстық топтармен байланысты өлімге әкелетін қылмыстардың өсуіне осылай әрекет етіп жатыр. 15 жасқа толмаған адамдарды қылмыстық жауапкершілікке тартуға болмайтындықтан, тергеушілер қылмыстық желілердің атыс пен қару-жарақ сатуға қатысу үшін балаларды көбірек тартатынын анықтады, - деп жазады басылым.

Бұған дейін Швецияда қылмыс көбейген соң кәмелетке толмағандарға қатаң жаза енгізілетіні хабарланған еді. Жаңа заң жобасында 13 және 14 жастағы балаларды ұстау изоляторларында ұстау туралы жазылған.

Швеция Әділет министрлігінің хабарлауынша, мұндай мекемелер келесі жазда кәмелетке толмаған құқық бұзушыларды қабылдай бастайды. Билік бұл шаралар қылмыстық топтардың астыртын ойын жүзеге асыруға тосқауыл болады деп үміттенеді. 

Абылайхан Жұмашев

Қылмыс көбейген соң Швеция кәмелетке толмағандарға қатаң жаза енгізеді

KAZINFORM — Қылмыс жасаған 13–14 жастағы жасөспірімдер 2026 жылдың шілдесінен бастап кәмелетке толмағандарға арналған ұстау орталықтарына қамалады, деп хабарлайды DW.

Бұған дейін үкімет ұлттық түрме басқармасына ауыр қылмыс жасаған 15–17 жастағы жасөспірімдерге арналған арнайы бөлімшелер құруды тапсырған.

Мұндай шаралар Швеция аумағында белсенді қылмыстық топтармен күрес мақсатында қабылданып отыр. Бұл топтар ауыр қылмысқа, соның ішінде кісі өлтіруге, кәмелетке толмағандарды тартады. Қазіргі уақытта елде 13 жастағы балалар қылмыстық жауапкершілікке тартылмайды.

Әділет министрі Гуннар Стрёммердің айтуынша, аса ауыр қылмыстар үшін қылмыстық жауапкершілік жасын төмендету қоғамды қорғау үшін ғана емес, сонымен қатар балалардың қылмыстық жолдан кетуіне көмектесу үшін қажет.

Оның сөзінше, бастапқы кезеңде алты қамау орталығында 13-тен 17 жасқа дейінгі құқық бұзушыларға арналған 100-ден 150-ге дейін орын ашылады. Ұлдар мен қыздар, сондай-ақ кіші және үлкен жастағы жасөспірімдер бөлек секцияларда ұсталады.

— 13–14 жастағы жасөспірімдер автоматты қарумен көшеде жүргенде, қоғам бұған барынша қатаң әрекет етуі тиіс, — деді Швеция парламентінің әділет комитетінің төрайымы Хенрика Винге.

Бұған дейін Швеция премьер-министрі елде қылмыстық жауапкершілік жасын төмендету жоспарланып отырғанын мәлімдеген болатын.

Назым Бөлесова

Швецияда зорлық-зомбылыққа қарсы министрлік кеңесі құрылады

KAZINFORM — Швеция үкіметі әйелдерге қатысты ерлер тарапынан жасалатын зорлық-зомбылыққа қарсы іс-қимылды күшейту және нөлдік төзімділік саясатын қалыптастыру мақсатында арнайы министрлік кеңес құратынын мәлімдеді. Бұл туралы АЗЕРТАДЖ жазды.

Бұл бастама Рождество мерекесі кезінде елде болған бірқатар резонансты қылмыстан кейін премьер-министр Ульф Кристерссон тарапынан жария етілді.

Ульф Кристерссонның айтуынша, үкімет осыған дейін бірқатар шара қабылдаған. Атап айтқанда, әлеуметтік қызмет пен полиция арасындағы құпиялылық кедергілері жойылды, қайталанған ауыр зорлау қылмыстары үшін жаза күшейтілді, сондай-ақ алдын алу мақсатында қамауда ұстау тетігі енгізілді.

Премьер-министр бұл зорлық түрімен күрес ұйымдасқан қылмысқа қарсы күреспен бірдей табандылықпен жүргізілуі тиіс екенін атап өтті.

Жаңа кеңес ұйымдасқан қылмысқа қарсы әрекет ететін қолданыстағы құрылым үлгісінде құрылады және оған У. Кристерссон жетекшілік етеді.

Кеңес құрамына әділет министрі, гендерлік теңдік жөніндегі министр, әлеуметтік қызмет ведомствосының басшысы және психиатриялық көмекті қадағалайтын әлеуметтік саясат министрі кіреді.

Үкімет басшысы мұндай трагедиялардың алдын алу үшін сот жүйесі, әлеуметтік қызмет пен денсаулық сақтау саласы арасында тығыз үйлестіру қажет екенін ерекше атап өтті.

Айта кетейік, Рождество күні Боден қаласында 55 жастағы әйел өз үйінде қаза тапқан. Ал 26 желтоқсанға қараған түні Рённингеде 25 жастағы әйел жоғалып, кейін оның мәйіті табылған.

Бұдан бұрын Швеция депортацияланбайтын қылмыскерлерге арналған талаптарды қатаңдататынын хабарлады.

Айнұр Тумакбаева

Швеция депортацияланбайтын қылмыскерлерге арналған талаптарды қатаңдатпақ

KAZINFORM — Швеция үкіметі қылмыстық әрекеттерге қатысы бар, бірақ әртүрлі себептермен елден шығарып жібере алмайтын адамдарға арналған талаптарды қатаңдатуға бағытталған заң жобасын ұсынды, деп хабарлайды АЗЕРТАДЖ.

Жаңа ұсыныс бойынша, мұндай адамдарға елде өмір сүру және жұмыс істеу әлдеқайда қиын болады.

Қазіргі уақытта олардың көпшілігі уақытша тұруға рұқсат алады. Бұл оларға тұрғын үйге, жұмысқа, әлеуметтік төлемдерге қолжетімділік және Еуропалық Одақ ішінде еркін қозғалу мүмкіндігін береді. Ал жаңа модельде елден шығару кейінге қалдырылып, уақытша тұруға рұқсат тек ерекше жағдайларда беріледі.

Жаңа ережелерге ұшырайтын адамдар халықтық тіркеу жүйесіне ене алмайды, әлеуметтік жеңілдіктерге қол жеткізе алмайды және жұмыс істей алмайды.

Сондай-ақ, олар Миграциялық қызмет орталықтарының бірінде тұрып, үнемі есеп беріп, белгіленген аумақтан шықпауға міндетті болады. Ережелерді бұзу айыппұл немесе түрме жазасымен қудаланады.

Миграция министрі Йохан Форселль реформаның мақсаты — қылмыс жасаған және депортацияға шешім қабылданған адамдардың елде өмір сүруін қиындатып, көпшілігін өз еркімен Швециядан шығуға итермелеу екенін атап өтті.

Үкіметтің бағалауынша, жаңа ережелер жыл сайын шамамен 200 адамға әсер етеді. Өзгерістер 2026 жылғы 1 мамырдан бастап күшіне енеді.

Бұдан бұрын Швеция ауыр қылмыс жасағандарды Сирияға күштеп жіберетінін жазғанбыз.

Айнұр Тумакбаева