Сауд Арабиясында шариғи сот 84 жастағы шал мен 15 жастағы бойжеткен қыздың арасындағы некені заңсыз деп таныды. Нақтырақ айтқанда, аталған елдің оңтүстігінде орын тепкен Жазан аймағындағы округтық шариғи сот атасы мен немересіндей, тіпті, шөбересіндей болатын ерлі-зайыптылар арасындағы некені заңсыз деп танып қана қоймай, олардың жас айырмашылығын ескермей осындай некені қиған құзырлы орын қызметкеріне тәртіптік жаза қолданды. Бұған қоса, отбасы-неке қатынасында ислам әдебін сақтауға мұқият қарауға шақырды. Шал мен қыздың некесін елеусіз әрі құқық қорғаушылардың назарынан тыс қалар ма еді, егер шалдың зайыбының үстінен жұбайлық парызын орындаудан бас тартты деп тиісті орынға шағымданбағанда. Шариғи соттың үкімі қыздың пайдасына шешілді. Бұл жайында «IslamNews» порталы «Gulf News» ақпарат көзіне сілтеме жасай отырып, хабар таратты. Сот отырысында белгілі болғандай, зорлықпен шалға ұзатылған қыздың әкесінің ақыл-есі ауысқан болып шықты. Әлеуметтік желіде бұл жағдай кәдімгідей дүрбелең тудырды – ғаламтор қолданушылары төрінен көрі жуық шалды байлығын пайдаланып, «жас иіс»-ке елтігенін қатаң сынға алып, бойжеткен қыздың батылдығына сүйсінді.