Сауд Арабиясы ауыл шаруашылығы саласындағы ауыз толтырып айта жүретін жетістігімен Гиннес рекордтар кітабына енді. Дәлірегі, аталған елдің Asir аймағында орын тепкен Wadi Bin Hashbal фермасы әлем бойыша аумағы жағынан ең үлкені болып шықты. Бұл жайында islam.kz порталы Gulf News ақпарат көзіне сілтеме жасай отырып мәлім етеді. 3,2 млн шаршы метрді алып жатқан ферма екі бөлікке бөлінген. Олардың әрқайсысы 500 текше метр суды сыйдыратын бетон  су қоймасымен жабдықталған. Өсімдіктер автоматты суғару жүйесімен суарылады. Ферма аумағында, бұдан бөлек, бес желдеткіш жылыжай мен өзге де қондырғылар бар. Суғару жүйесінде суды тазарту технологиясы бар. Фермада лимон, апелсин, мандарин, анар, жүзім, інжір, зәйтүн, т.б. өсіріледі. Фермада, сондай-ақ, ауыл шаруашылығы өсімдіктерімен түрлі тәжірибе жүргізілетін арнайы алқаптар бар.