Иран билігі ресейлік С-300 зенитті зымыран кешенін Фордодағы ядролық нысанда орналастырды. Бұл жайында «ИРИ» мемлекеттік телеэфирінен зымыранға қарсы қорғаныс күштерінің қолбасшысы Фарзад Есмаили мәлім етті. Иран билігінің алпауыт державалардан құралған «алтылықтың» күш салуымен жабылған уран байыту зауытын зымыранмен қорғауын қалай түсінуге болады? Сарапшылар осыған бас қатыруда. Біз сөз етіп отырған нысан ел астанасы –Тегеранның оңтүстік-батысында орын тепкен Кум қаласының маңында орналасқан. Тамыз айының 28-і күні Иран жетекшісі аятолла Али Хаменей Ресейдің С-300 зымыранын алуға АҚШ-тың барынша тосқауыл жасағанын, осылайша Иранның өзін-өзі қорғау құқығын жоққа шығарғанын мәлімдеген еді.