Малайзияның Сунгай Гелугор ауданындағы алғыр да зерек оқушылар мен студенттер жергілікті мешітте тек рухани ілім алып қоймай, сонымен қатар, оқу үлгеріміне қарай материалдық сыйақы алып жүр. Бұл жайында islam.kz порталы Free Malaysia Today ақпарат көзіне сілтеме жасай отырып мәлім етеді. Міне, аттай алты жыл болыпты – Жамық мешіті мемлекеттік университеттің бірінші курсына түскен жастарға ақшалай сыйлық беріп келеді. Cондай-ақ, оқу үлгерімі жақсы және оқуда озат оқушыларға да ақшалай сыйақы тағайындауды дәстүрге айналдырған. Бұдан бөлек, таңғы намазын мешітте жамағатпен оқыған бозбала мен бойжеткендер де құр қол қайтпайды. Мұндай бастама тұрмысы төмен отбасыларына қолдау ретінде қолға алынған болатын. Бастапқыда аталмыш бағдарлама тек әлеуметтік жағдайы мен мәртебесі сын көтермейтін отбасыларын қамтыса, соңғы кезде табысы орташа отбасыларына да қолдау көрсетіп келеді. Мешіттің бұл бастамасы өз кезегінде жастардың білімге деген ынта-ықыласын оятып, болашаққа инвестиция құюда.