Саудия билігі биылғы Рамазан айын өткізу тәртібін белгілейтін жаңа ереже қабылдады және жария етті. Бұл жайында islam.kz порталы өз кезегінде Middle East Monitor дерек көзіне жөн сілтеген IslamNews ақпарат көзіне сілтеме жасай отырып мәлім етеді. Сауд Арабиясының ислам істері жөніндегі министрлігі шығарған аталмыш құжатта он жаңа талап келтірілген. Соның ішінде имамдар мен азан шақырушылардың жұмыс орнында орынды себепсіз болмауына жол берілмейді. Бұдан бөлек, тарауық намазын созып оқымау жағы қарастырылған. Жамағатқа мешітте бейне жазба жүргізуіне және селфиге, сондай-ақ, әлеуметтік желі арқылы уағыз бен өзге де құлшылық түрлерін трансляциялауға тыйым салынады. Қасиетті ораза айының соңғы он күнін мешітте өткізетін (түнейтін) адамдардың жеке мәліметтерін білуді міндеттейтін талап та қамтылған. Дегенмен, мешіт ішінде бейне бақылау болмайтыны айтылған. Ауызашар мешіт ішінде берілмейді (ауласында ауызашар беруге рұқсат етілген) және ауызашар үшін қайырымдылық көмек алуға тыйым салынған. Тағы бір талап бойынша мешіттер тарататын азан дауысын шектеп, Рамазан айында дауыс зорайтқыш арқылы Құран оқуға және намаз оқуға тыйым салды. Әдеттегідей саудиялықтарға осы Рамазан айында мешіттерге балаларды әкелуге тыйым салынды. Бұл шешімнің себептері көрсетілмеген.