Конгода маймыл шешегін жұқтырудың 30 мың дерегі тіркелді

Конгода жыл басынан бері маймыл шешегін жұқтырған 30 мың жағдай тіркелді, деп хабарлайды BAQ.KZ.

Індеттен 988 адам көз жұмған. Олардың 70 пайызы – жасы 5-ке толмаған балалар. Бұл туралы елдің Денсаулық сақтау министрі мәлімдеді.

Конгоның Денсаулық сақтау министрі инфекцияның барлық 26 провинцияда таралғанын жеткізді. 5 қазанда Конгода аталған індетке қарсы вакциналау науқаны басталған. Үкімет 5 миллион адамға екпе салуды жоспарлап отыр.

Ал Біріккен Ұлттар Ұйымы маймыл шешегі Африканың 18 елін қамтып үлгергенін айтады. Бұдан бөлек, індет Австралия, Индонезия, Швеция, Испания мен Пәкістанда тіркелген.

Нигерияда тырысқақ індетінен қайтыс болғандар саны 359 адамға жетті

KAZINFORM – Нигерияның ауруларды бақылау және алдын алу орталығының (NCDC) мәліметінше, жыл басынан бері елде тырысқақ індетін жұқтырудың 10 857 жағдайы анықталып, аурудан 359 адам қайтыс болған. Бұл туралы Анадолы ақпарат агенттігі хабарлайды.

Мәлімдемеде айтылғандай, биыл елде тырысқақ ауруын жұқтыру жағдайларының саны күрт өскен. Оқиғалар санының 220 пайызға артуы үлкен алаңдаушылық тудырды.

Осы уақыт ішінде індет ел астанасы Абуджа мен Африка елінің 36 штатына тарады.

Тырысқақ індетіне байланысты Нигерияда 26 маусымда төтенше жағдай жарияланды. Өткен жылы елде тырысқақпен ауырған 3 мыңнан астам адам тіркеліп, 100-ден астамы қайтыс болған.

Тырысқақты «Вибрион» бактериялары тудырады. Ол тамақ және су арқылы таралып, ауыр диарея мен ағзаның сусыздануына әкеледі. Ем болмаған жағдайда, ол өлімге соқтырады.

Нигерияда таза судың жетіспеушілігінен басқа, жұқпалы ауруларды жұқтыру және олардан өлім қаупі тиісті медициналық қызметтердің болмауынан күшейіп отыр.

Елде безгек, полиомиелит, іш сүзегі және маймыл шешегі вирусын жұқтыру жағдайлары жиі кездеседі.

Пәкістанда полиомиелит дерті өршіп тұр

Пәкістанда полиомиелит дертінің жаңа жағдайлары тіркеліп жатыр, деп хабарлайды BAQ.KZ.

CBS News таратқан ақпаратқа сәйкес, елде наурыз айынан бастап полиомиелит дертінің жаңа деректері анықталуда. Бұл үкіметке аталған ауруды түп-тамырымен жою шараларын күшейтуге белгі болып отыр.

Полиомиелитті жою бойынша төтенше операциялар ұлттық орталығының өкілі Анварул Хактың айтуынша, наурыздан бері республикада 32 жаңа жағдай анықталды.

Жақын арада Пәкістан полиомиелитке қарсы 32 млн балаға екпе салуды жоспарға қойды. Жаңа жалпыұлттық науқан қазанның аяғында басталады.

Біз жоғары вакцинациямен қамтып, қоғамға балалардың иммунитетін қалыптастыру үшін кешенді медициналық қызмет тәуекелінің жаңа деңгейін ұсынамыз, - деп атап өтті ол.

Полиомиелит Ауғанстанмен шектесетін Белуджистан солтүстік-батыс және оңтүстік-батыс провинциясында тіркелген.