Анталия курортты провинциясының муниципалитеті елде тұңғыш рет көбелектер бағының ашылатынын жариялады. Бұл жоба 3 млн долларға бағаланып отыр. Сондай-ақ, оны ботаникалық баққа әрі бір мезгілде жұрттың демалатын орнына айналдыру жоспарланып отыр. «Осынау өзгеше жобаға балалармен қатар ересектер де қызығушылық танытып отыр. Өзге де көңіл көтеру ойын-сауықтарынан бөлек жабық аумақтан қанатты жәндіктердің түр-түрін тамашалай алады», - деді келешек бақтың директоры Барыш Дурсун. Оның сөзіне қарағанда, аталмыш бақта әлемнің 25 елінен алдырылатын 50-ге жуық көбелек түрі болады. Алдын ала алынған мәліметке қарағанда, бақтың құрылысы қасиетті Рамазан айының соңында аяқталады.