Жапондық балмұздақ өндірушілер аталған тауар бағасының көтерілуіне байланысты жұртшылықтан бастарын иіп, кешірім сұрады. Олардың кешірім сұраған сәті бейнеленген видеоны бір аптаның ішінде 1,2 млн адам тамашалап үлгерген. Бұл жайында «kotaku.com» ақпарат көзі хабар таратты. Нақтырақ айтқанда, күншығыс елінің балмұздақ өндірумен айналысатын «Akagi Nyugyo Co» компаниясы өкілдері соңғы ширек ғасыр ішінде, яғни, 25 жыл ішінде аталған тауар бағасының бірінші рет көтергендері үшін тұтынушылардан кешірім сұраған. Ширек ғасыр бойы «Gari-Gari» балмұздағы 60 йенге сатылып келсе, биылдан бастап, оның бағасы он йенге көтерілді. Аталған тауар бағасының көтерілуіне өзіндік құн мен жұмысшы күшінің қымбаттағаны себеп болған. Аталмыш компания өкілдері кешірім сұрап қоймай, тіпті, клиенттеріне де осы тақырыпта ән шырқап берді. Олар осылайша бір оқпен екі қоянды атып алды десе де болады. Біріншіден, клиенттерінен кешірім сұрап, көңілдерін аулады, екіншіден, өз тауарларын жанама түрде болса да жарнамалады.