Аппарат замануи құрал-құрылғылармен және озық технологиямен жабдықталған. Бұл жайында islam.kz порталы Tansim ақпарат көзіне сілтеме жасай отырып мәлім етеді. Иран өзінің Soraya спутнигін жердің төменгі орбитасына сәтті ұшырды. Құрылғы ғарышқа Qaem-100 зымыран тасығышының көмегімен аттанды. 11 минуттың ішінде үш сатылы қатты отынмен жұмыс істейтін «Qaem-100» зымыран тасығышы ғарыш аппаратын жер бетінен 750 шақырым биіктіктегі орбитаға сәтті шығарды. Аталған елдің байланыс және ақпараттық технологиялар (ITI) министрі Иса Зарепур Soraya спутнигінің салмағы шамамен 50 келі тартатынын мәлімдеді. Soraya ғарыш кемесі біздің планетамыз туралы ақпаратты жүйелі түрде бақылауға және жинауға арналған. Ол метеорология, климатология және геологияны қоса алғанда әртүрлі салаларда зерттеулер жүргізуге мүмкіндік беретін заманауи құралдармен және озық технологиялармен жабдықталған. Пентагон өкілдерінің пікірінше, Теһранның спутниктік баллистикалық зымыраны ядролық оқтұмсықтарды қолдануды қоса алғанда, алыс қашықтыққа ұшатын қару-жарақтарды ұшыру үшін де қызмет ете алады.