Иран билігі Ауғанстан әйелдеріне жоғары білім алуына көмектеседі. Бұл жайында islam.kz порталы islam-today ақпарат көзіне сілтеме жасай отырып мәлім етеді. Тәліптер радикалды қозғалысы (Біріккен Ұлттар Ұйымының қарарымен террористік ұйым ретінде танылуына байланысты әлемнің көптеген елінде, соның ішінде Қазақстанда насихаты мен қызметіне тыйым салынған – ред.)  Ауғанстанда әйелдердің жоғарғы оқу орындарында білім алуына түбегейлі тыйым салынғанын хабарлағанбыз. Иран президентінің отбасы және әйелдер істері жөніндегі орынбасары Енсия Қазалы Twitter әлемжелісіндегі микроблогында жариялаған мәлімдемесінде: «Әйелдер істері жөніндегі комиссияның соңғы отырысында осы комиссияның директоры Иран билігінің ауғандық босқын әйелдерге көрсеткен қолдауына алғыс айтып, жоғары бағалады. Енді Ислам Республикасы ауғандық әйелдерге университеттік білім алудың әртүрлі кезеңдерінде білімін жалғастыруға көмектесуге дайын», деп жазыпты.