KAZINFORM – Мамандар адамдар өздерінің генеалогиялық ДНҚ сынамаларының нәтижелерін басқа елдердің азаматтығын алу үшін қолдана бастағанын айтты, деп хабарлайды The Guardian.
ДНҚ генеалогиялық сынақтары алғаш қолжетімді болған 2000 жылдан бері әлем бойынша 40 млн-нан астам адам әртүрлі компания арқылы бұл қызметтерді пайдаланған.
«Адамдар қаншалықты көп сынақтан өтіп, өздерінің шығу тегі мен биологиялық ата-аналары туралы білсе, соғұрлым олар бұл деректерді белгілі бір елдің азаматтығын алу үшін дәлел ретінде пайдалана алады», - деді Бат университетіндегі Милнер эволюциясы орталығының директоры, профессор Тури Кинг.
Кинг ДНҚ тестін тапсыру кейбір британиялықтар үшін болашақта қос азаматтық алудың оңай әрі кең таралған тәсілі болады деп санайды. Оның айтуынша, ЕО-ға мүшелігі бар ирланд төлқұжаттары қатты сұранысқа ие болуы мүмкін.
Ондаған жылдар бойы тұрмысқа шықпаған ирландиялық аналар балаларын британиялықтардың асырап алуына беруге мәжбүр болды.
Ирландия Сыртқы істер департаментінің өкілі осы елдің әлеуетті азаматтары ата-анасының бірі арқылы Ирландия азаматтығын алуға құқықтарын дәлелдеу үшін ДНҚ дәлелдерін пайдалана бастағанын және бұл дәлел төлқұжат алуға өтініш берген кезде қабылданатынын растады. Мысалы, 2022 жылы «DNAFamilySecrets» шоуына түскен Ричард Сэйерс ЕО азаматтығын алу үшін ДНҚ дәлелдерін пайдаланған алғашқы британиялықтардың бірі болды.
