Кенияда Mentor Publishing баспасы Пайғамбарлар падишасы (ﷺ) бейнеленген мектеп оқулығын кері қайтарып алуға мәжбүр болды. Қоғамдағы наразылыққа байланысты. Бұл жайында islam.kz порталы өз кезегінде Saudi Gazette мерзімді басылымына жөн сілтеген IslamNews ақпарат көзіне сілтеме жасай отырып мәлім етеді. Аталмыш баспаның әрекетіне Адамзаттың асыл тәжі (ﷺ) бейнеленген екінші сыныпқа арналған дінтану пәніне жергілікті мұсылмандар наразылық білдірген еді. Осы орайда Африка құрлығының шығысында орын тепкен ел тұрғындарының 11%-на жуығын мұсылмандар құрайтынын айта кетпекпіз. Баспа білместікпен жіберген қателігін мойындап, жергілікті мұсылмандардан кешірім сұрады әрі мұндай келеңсіздіктің болашақта қайталанбайтынына уәде берді. Болашақ ұрпақты тәрбиелеуде маңызды рөл атқаратын оқулықты дайындауда жергілікті жұрттың мәдениеті мен салт-санасын ескермейтін баспаның бұл әрекеті осындай жауапкершілігі мол істі кімдерге сеніп тапсыруға болмайтынын тағы бір мәрте көрсетіп берді.