Ирак астанасы Бағдадта 3 бірдей теракт болды. Салдарынан 100-ге жуық адам қаза тауып, ондаған тұрғын түрлі деңгейдегі жарақаттар алды. Алғашқы шабуыл қаланың негізінен шиіттер тұратын ауданындағы базар маңында жасалды.  Көлік ішінде отырған жанкешті жарылғыш затты іске қосып, 60-тан астам адамның өліміне себепкер болды.  Бірнеше сағаттан кейін шаһардың шиіттер өмір сүретін тағы бір ауданында бомба қойылған көлік жарылды.  «Әл-Арабия» телеарнасы таратқан ақпарат бойынша, теракт салдарынан 15 адам көз жұмған.  Ал үшінші жарылыс Бағдадтың сүнниттер тұратын бөлігінде болып, тағы 7 адамның өмірін қиды.  Жергілікті ақпарат құралдарының хабарлауынша, лаңкестік әрекеттерден зардап шеккендердің саны артуы мүмкін.