Apple америкалық компаниясы 2020 жылға қарай тоқпен жүретін көлік өндірісін қолға алмақ. Автоөндірушілердің электромобилдің жаңа үлгісін әзірлеп, жасап шығаруына кемінде бес-жеті жыл кетуі мүмкін. Apple-дің бұл өндірісті тездетіп қолға алуына қарағанда аталмыш компанияның осы жобаға үлкен маңыз беріп отырғанын көрсетсе керек. Бұған дейін хабарланғандай, аса құпия жағдайда жасалып жатқан Apple электромобилі пішіні жағынан минивэнге ұқсас келеді. Компанияның бас директоры Тим Кук осыдан бір жыл бұрын мақұлдаған жобаға уақытша "Титан" атауы берілген. The Wall Street Journal газетінде келтірілген мәлімет бойынша Apple-дің электромобилін құрастырып шығу үшін 1 мыңға жуық маман атсалысып жатыр.