Бұл тізімде Қытай көш бастаған: өткен жылы дәулеті бір миллион доллардан асатын ауқаттылардан 15 мыңы елден кеткен. Екінші орында Ресей Федерациясы тұр - 2018 жылы аталмыш елден 7 мың миллионер қарасын батырған. Ал үшінші орынға Үндістан жайғасқан - 5 мың миллионер табанын жалтыратып тайып тұрған. Одан кейінгі орыннан Түркия көрінген - 4 мың миллионер. Бесінші орында Франция (3 мың миллионер). Бұл жайында New World Wealth консалтингтік компаниясының Global Wealth Migration Review атты зерттеу нәтижесінде айтылған. Аталған елдерден кеткен миллионерлер негізінен Австралияға қоныс аударған. Яғни, өткен жылы аталған елге келген миллионерлердің қарасы 12 мың адамға жеткен. Екінші орында АҚШ - 10 мың миллионер. Үшінші орында Канада тұр - 4 мың миллонер. Миллионерлердің өз дәулетін сақтау әрі ұлғайту үшін қолайлы елдерге ағылады. Олардың көші-қонының негізгі себебі осында.