Әбу-Даби жаһандық неке қию орталығы мәртебесін иеленді. Соның ішінде шетелдіктер үшін азаматтық некенің орталығына айналып отыр. Бұл жайында islam.kz порталы Khaleej Times ақпарат көзіне сілтеме жасай отырып мәлім етеді. Біріккен Араб Әмірлігінің сот департаменті келтірген дерекке қарағанда, өткен жылы сағатына орташа есеппен 13 неке қиылған. Аталған араб елінде азаматтық неке туралы заң қолданысқа енген сәттен бері ел аумағында ұзын саны 53 мың шетелдік неке қидырған. Әбу-Дабиде шетелдік мұсылман еместермен жұмыс істеу үшін зайырлы құқықтық жүйе бойынша жұмыс істейтін мамандандырылған Азаматтық отбасылық сот құрылды. 2022 жылы 5,4 мыңға жуық неке тіркелген болса, 2023 жылы - 12 мың, 2024 жылы - 16,2 мың, ал 2025 жылы бұл көрсеткіш 19 мыңға жетті. Бүгінде сот айына 1,6 мыңға жуық өтінімді немесе күніне 70-ке жуық тіркеуді қарастырады. Бүгінде процесс толығымен сандық форматқа көшірілді. Шетелдік жұптар мемлекеттік платформа арқылы онлайн өтініш беріп, бейне байланыс арқылы жеке басын анықтау процедурасынан өтіп, өтініш берген күні неке қию экспресс-қызметін қоса алғанда, тіркеудің ыңғайлы форматын таңдай алады. Сондай-ақ, неке келісімшартын жасау мүмкіндігі қарастырылған, ал бұл қызмет халықаралық қоғамдастықтың ашық және түсінікті заң рәсімдеріне деген сұранысына жауап береді. Салықты пайызсыз бөліп төлеуге мүмкіндік берілген. Сот, сондай-ақ, ажырасу процедурасын да қарайды. 2025 жылы бірінші отырыста сот шешімін алуға мүмкіндік беретін «кінә артпау» жүйесі бойынша 640 ажырасу оқиғасы тіркелді - 30 күн ішінде. Тараптардың қаржылық мүдделерін тәуелсіз сарапшылар тексереді, ал арада бала болған жағдайда ең алдымен баланың мүддесі ескеріледі, соның ішінде автоматты түрде ажырасқан ата-анасы балаға қамқор болу құқығын иеленеді.