Мұрынға дәрі тамызса, ораза бұзыла ма?
Мұрынға дәрі тамызса, ораза бұзыла ма?
2 жыл бұрын 8329

Ассаламуғалейкум! Ораза ұстап жүргенде көзге немесе мұрынға дәрі тамызу, оразаны бұза ма? Бибәти Бақытқызы

Уағалейкумсалам!
Көзге тамызған дәрі ішке түспейтіндіктен оразаны бұзбайды[1].

Ал, мұрынға келер болсақ, мұрынның ішкі құрылысы ас өтетін өңешпен байланысы болғандықтан, оған тамызылған дәрінің ішке кетіп қалу қауіпі басым. Сол себептен мұрынға тамызылған дәрінің оразаны бұзады деуге негіз бар. Сондай-ақ, ертеректе ғалымдарымыз мұрынға тамызған дәрі оразаны бұзады деген[2].

Оның үстіне ардақты Пайғамбарымыз (с.а.у.): «Дәретте мұрынға суды қаттырақ тартыңдар. Бірақ оразада олай істемеңдер (қатты тартпаңдар)»[3], - дей келе мұрын арқылы судың ішке кетіп қалуы мүмкін екенін ескерткен.

Мұрынға тамызуды кешке ауызашар уақытқа қалдырған дұрыс. Мұрынға көбіне аллергиямен ауыратын кісілер тамызып жататындықтан, оның укол арқылы жасалатын емі болса, соны қарастырған жөн.

 

[1] Фатауаль Хиндия – 1/224 бет.
[2] Тухфатул Фуқаһа – 1/355 бет.
[3] Муснәд Ахмәд ибн Ханбәл - №16035 хадис.

Абдусамат Қасым